STAR NEZ-də istehsal göstəriciləri dəyişib
Azərbaycan Dövlət Neft Şirkəti SOCAR-a məxsus, Türkiyədə yerləşən STAR Neft Emalı Zavodunun istehsal göstəriciləri 2026-cı ilin aprelində müxtəlif istiqamətli dinamika nümayiş etdirib.
Crossmedia.az xəbər verir ki, bu, Türkiyənin Enerji Bazarını Tənzimləmə Qurumunun (EPDK) məlumatlarından məlum olur.
Dizel istehsalı 500 134 tona enib ki, bu da 2025-ci ilin aprelində qeydə alınan 511 695 tonla müqayisədə 2,27 faiz azdır. Tərkibində biodizel olan dizelin istehsalı isə 67,22 faiz azalaraq 5 583 ton təşkil edib. Ötən ilin eyni dövründə bu göstərici 17 034 ton olub.
Eyni zamanda, aviasiya yanacağının istehsalı 186 232 tona çatıb ki, bu da 2025-ci ilin aprelindəki 179 441 ton göstəricidən 3,80 faiz çoxdur. Mayeləşdirilmiş neft qazının (LPG) istehsalı isə 34,61 faiz artaraq 25 448 tona yüksəlib. Ötən ilin eyni dövründə bu göstərici 18 910 ton təşkil edib.
Nafta istehsalı 3,91 faiz artaraq 137 001 tona çatıb. 2025-ci ilin aprelində bu göstərici 131 847 ton olub. Neft koksunun istehsalı isə 6,18 faiz artaraq 65 378 ton təşkil edib. Ötən ilin eyni dövründə bu rəqəm 61 568 ton idi.
2025-ci ilin aprelində qeydə alınmayan ağır vakuum qazoylunun həcmi 2026-cı ilin aprelində 5 165 ton təşkil edib. Bununla yanaşı, 2025-ci ilin aprelində 22 646 ton səviyyəsində qeydə alınan yüksək kükürdlü dizel son hesabat dövründə göstərilməyib.
2018-ci ilin oktyabrında istismara verilən STAR Neft Emalı Zavodu Türkiyənin real sektoruna qoyulan ən böyük sənaye investisiyasıdır. Zavod neft emalını neft-kimya istehsalı ilə birləşdirir və SOCAR-ın regiondakı downstream əməliyyatlarında mühüm rol oynayır.
18:57 16.06.2026
Oxunuş sayı: 39
