Kürünün təbii olub- olmadığını necə müəyyənləşdirə bilərik? - Sadə izah
Azərbaycan Qida Təhlükəsizliyi Agentliyi ölkə üzrə saxta və yararsız kürü məhsulları ilə bağlı genişmiqyaslı nəzarət tədbirləri həyata keçirib. Agentlik 10 ərzaq bazarı, 8 ticarət obyekti, 14 idxalçı anbarı və 61 ictimai iaşə müəssisəsində yoxlamalar aparıb. Nəticədə bir sıra bazarlarda, o cümlədən “Keşlə Bazarı”, “Özbək Bazarı”, “Sahil Bazarı” və “Yaşıl Bazar”da ciddi nöqsanlar aşkarlanıb. Aparılan yoxlamalar zamanı etiketsiz, sənədsiz və yararlılıq müddəti bitmiş kürü məhsullarının satışa çıxarıldığı müəyyən edilib. Həmçinin bəzi hallarda təbii farel kürüsü adı altında süni məhsulların satışı faktı qeydə alınıb. Laborator müayinələr nəticəsində bir kürü nümunəsində insan sağlamlığı üçün təhlükəli hesab edilən Listeria monocytogenes bakteriyası da aşkarlanıb. Aşkar edilən uyğunsuzluqlar nəticəsində minlərlə kiloqram kürü satışdan çıxarılaraq məhv edilib.
Kürülərin saxta, yoxsa təbii olduğunun necə müəyyənləşdirə biləcəyimiz barədə qida eksperti Ağa Salamov Crossmedia.az-a açıqlama verib:
"İşbazlar çox vaxt alginat adlı bir maddədən istifadə edirlər. Bundan əlavə, dəniz yosunlarından hazırlanmış kürlər də var. Belə ki, oraya balıq ekstraktı qatmaqla balıq dadı verə bilirlər və müəyyən hiylələrə əl atırlar. Məsələnin əsas mahiyyəti işbazlıqdır. İstehlakçılar kürün miqdarında pulu verib kürü alır və bu kürünün 100 qramına 130–150 manat pul verilir. Aldığı kürü də sünidir. Təbii ki, bunu heç cür ayırd etmək mümkün deyil. Amma bəzi kürü növləri də var ki, bunu mütəxəssislər aşkar edə bilir və laboratoriya şəraitində məlum olur ki, bu haradan və hansı maddədən hazırlandı və necə hazırlandı. Məsələn, ip ucları, organoleptik analizləri zamanı baxanda görürsünüz ki, süni kürlər şəffaf olur, yəni parıltısı daha çox olur, nəinki təbii kürlər".
A.Salamov vurğulayıb ki, təbii kürlər mat rəngində və parıltılığı az olur:
"Buna ayırd etmək də çox çətin məsələdir, sadəcə bir-birinin yanına qoyanda ayırd etmək olur, belə baxanda isə çox bilmək mümkün deyil. Amma veqanlar üçün dəniz yosunundan, müxtəlif şirələrdən də təbii kürlər hazırlana bilər. Məsələn, onlar üçün hazırlanarsa, veganlar üçün nəzərdə tutulmuş “süni kürü” yazısı altında satılmalıdır və yaxud qablaşdırmada tərkibi göstərilməlidir. Təbii kürüdürsə, onu süni kürü adı altında satmaq işbazlıqdır, yəni bu qanun pozuntusudur və burada düzgün olmayan çox şeylər var ki, onları da aşkar etmək lazımdır".
Fatimə
18:56 06.05.2026
Oxunuş sayı: 42
