Tramp hədələdi - İranın nüvə obyektləri təhlükədədir
Donald Trampın İranın nüvə obyektlərinə zərbə endirmək variantını nəzərdən keçirtməsi hazırki situasiyada təhlükəlidir. Çünki Yaxın Şərqdə vəziyyət gərgindir və nəzarətdən çıxmaq təhlükəsi var. Belə halda İrana qabaqlayıcı addımlar adı altında nüvə obyektlərinə zərbə İranın cavab zərbələri ilə nəticələnə bilər.
Bu fikirləri politoloq Elçin Xalidbəyli Crossmedia.az-a açıqlamasında deyib.
O, bildirib ki, ABŞ-nin Suriyadakı və İraqdakı hərbi bazaları hədəf seçiləcək. Eyni zamanda İran ABŞ-nin Yaxın Şərqdə dəstəklədiyi İsrailə də zərbə endirə bilər. Bu halda Yaxın Şərq yenidən genişmiqyaslı savaş məkanına çevrilə bilər. Böyük ehtimal ilə Donald Trump administrasiyasında elə qənaət yaranıb ki, İranın Yaxın Şərqdəki proksi qüvvələri zəiflədiyindən İranın müqavimət imkanları hazırda kifayət qədər məhdudlaşıb. Yəni belə situasiyada İrana zərbə endirmək o qədər də təhlükəli olmaz. Yalnız istənilən halda İranın əks zərbələrinin təhlükəli olma ehtimalı yüksəkdir.
Politoloq bildirib ki, Donald Tramp təxminən İsrailin Baş naziri Benyamin Netanyahunun son açıqlamasını təkrarlayıb. Çünki Benyamin Netanyahu İranın nüvə obyektlərinə zərbə endirmək ehtimalını nəzərdən keçirildiyini bildirib. Donald Tramp isə seçkilərdən öncəki vədlərində İsraili ABŞ-nin bütün imkanları çərçivəsində dəstəkləyəcəyini bəyan edib. Yəqin ki Donald Tramp vədlərini həyata keçirtməyi düşünür.
Elçin Xalidbəyli əlavə olaraq qeyd edib ki, Yaxın Şərqdə baş verən hadisələrdə əvvəlcə İranın proksi qüvvələrini sıradan çıxartağa cəhd göstərdilər və böyük ölçüdə buna nail oldular. Ardınca İranın Rusiya ilə ortaq dəstəklədiyi Bəşər Əsəd rejimi məhv edildi. ABŞ və Qərb birbaşa hədəf olaraq İranı ön plana çıxartmaq istəyib və İranın hədəfə alınma ehtimalı artmağa başlayıb.
Politoloq mövzu ilə proqnozlarında deyib ki, bütün bunlar indiki situasiyada təhlükəli proseslər vəd edir. Təbii ki, əgər ABŞ İranın nüvə obyektlərinə zərbə yendirərsə, bu ABŞ İran münasibətlərini savaş həddinə qədər gərginləşdirəcək. Həmçinin, belə zərbələr İran daxilində ciddi qarışıqlıq yarada bilər. Hətta İrandan qaçqın axınının baş vermə ehtimalı var və bütün bunlar mövcud ətraf regionlara da mənfi təsir göstərə bilər. Ümumiyyətlə cari vəziyyət elə həssas mərhələyə qədəm qoyub ki, istənilən hərbi qarşıdurma təhlükəsindən yayınmaq məqsədə uyğundur.
Fidan Hacızadə
12:29 13.12.2024
Oxunuş sayı: 9450
