Bir aya 8 min hektar - mina təmizlənməsi niyə uzun çəkir?
Aprel ayında ANAMA tərəfindən 8 min hektara yaxın ərazinin minalardan təmizlənməsi prosesi postmüharibə dövründə ən kritik və strateji məsələlərdən birində ciddi irəliləyişin göstəricisi kimi qiymətləndirilir.
Lakin mövcud dinamika fonunda əsas sual açıq qalır: bu temp davam edərsə, işğaldan azad olunmuş ərazilərin mina təhlükəsindən tam azad edilməsi nə qədər vaxt aparacaq?
Mövzu ilə bağlı hərbi ekspert Asəf Quliyev Crossmedia.az-a açıqlama verib:
“Azad olunmuş ərazilərin mina və partlamamış hərbi sursatlardan təmizlənməsi sözsüz ki, bu gün Azərbaycan dövləti üçün prioritetdir. Ancaq bu əməliyyatların hansı sürətlə getməsi proqnozlaşdırılan bir məslə deyil.
Bunun bir neçə səbəbi var. Birincisi, minalanmış ərazilərin dəqiq xəritəsi yoxdur. İkincisi, ərazi minalıdırsa, orada hansı sayda minanın olduğu bəlli deyil. Üçüncüsü, minalanmış ərazilər relyef baxımından da müxtəlifdir.
Bütün bunlar və digər amillər təmizlənmə işlərini çətinləşdirir.
Buna görə də, Azərbaycan dövləti müxtəlif yollarla bu işin asanlaşdırılmasına çalışır. Yeni qəbul olunmuş qanunvericiliyə görə bu işlə məşğul olacaq özəl şirkətlərin formalaşdırılması nəzərdə tutulur. Amma bu işin öhdəsindən gələcək kadrların yetişdirilməsi məsələsi də var.
Bundan başqa xarici partnyorlarla ciddi əməkdaşlıq edilir ki, bu da müsbət amildir. Amma bütün cəhdlərə baxmayaraq dəqiq vaxt söyləmək çətindir”.
Ayhan
12:00 02.05.2026
Oxunuş sayı: 68
