XTQ 44 günlük müharibədən sonra ən yüksək səviyyəyə çatıb
Azərbaycan Ordusunun ən peşəkar və strateji bölmələrindən biri olan Xüsusi Təyinatlı Qüvvələrin yaradılmasından 27 il ötür.
30 aprel 1999-cu ildə formalaşdırılan bu bölmə ötən müddət ərzində ordunun ən çevik, yüksək hazırlıqlı və operativ qüvvələrindən birinə çevrilib. XTQ-nin əsas missiyası xüsusi əməliyyatların icrası, riskli tapşırıqların yerinə yetirilməsi və düşmən arxasında fəaliyyətin həyata keçirilməsidir.
Qurumun yaranmasından bu günə qədər keçdiyi yol həm peşəkarlıq, həm də döyüş təcrübəsi baxımından Azərbaycan hərb tarixində mühüm mərhələ kimi qiymətləndirilir.
“Xüsusi Təyinatlıların Qaziləri, Şəhid Ailələri və Veteranları” İctimai Birliyinin sədri Bəhruz Məmmədzadə Crossmedia.az-a açıqlama verib:
"Xüsusi təyinatlı qüvvələr Ulu Öndərin fərmanı ilə 1999-cu ildə yaradılmışdı. O gündən bu günə qədər bütün fəaliyyətini gizli şəkildə inkişaf etdirmişdir. Aprel döyüşlərində qismən öz gücünü göstərdi, 44 günlük Vətən müharibəsində isə xüsusi təyinatlı qüvvələr, mən deyərdim ki, yerinə yetirdiyi döyüş tapşırıqları, göstərdiyi şücaət və peşəkarlıqla həm xalqımızın, həm də Zəngəzur bölgəsindəki başqamanların etimadını ən yüksək səviyyədə doğrultmuşdur.
Xüsusilə bu əməliyyatlarda və digər yaşayış məntəqələrində aparılan əməliyyatlarda bütün dünyada müasir döyüşün necə aparılmasını ortaya qoymuşdur. Bu gün bütün dünyada inkişaf etmiş ölkələr Azərbaycanın xüsusi təyinatlı qüvvələrinin keçdiyi döyüş yolu və təcrübəsini öyrənir, öz ordularında və birləşmələrində bunu tətbiq etməyə çalışırlar, araşdırırlar. Ona görə yox ki, biz burada bir düşmənlə müharibə apardıq və qələbə qazandıq. Xüsusi təyinatlı qüvvələr eyni zamanda ədalətli müharibənin necə aparılmasını da ortaya qoydu. Onlar mobil və operativ şəkildə yaşayış məntəqələrində, dinc insanların arasında yerləşmiş qanunsuz hərbi birləşmələri necə sıradan çıxarmağı nümayiş etdirdilər. Bu, ədalətli müharibədir, yəni bir mülki şəxsin burnu qanamadan orada fədakarlıq və peşəkarlığın göstərilməsidir. Xüsusi təyinatlı qüvvələr 44 günlük Vətən müharibəsindən sonra artıq demək olar ki, ən yüksək səviyyəyə çatıb, inkişaf etmiş orduların sıralarında yer alır. Bu gün həm təchizat baxımından, həm peşəkarlıq baxımından, həm də icra etdiyi tapşırıqlar baxımından çox yüksək səviyyədə inkişaf etmişdir.
Bu gün baxmayaraq ki, qazilər olub, sıradan çıxaraq hərbi xidmətə yararsız hala düşənlər də var, onlar da öz missiyalarını yerinə yetirirlər".
B.Məmmədzadə əlavə edib:
"Mən deyərdim ki, bizdə bir prinsip var: xüsusi təyinatlı kursu keçdikdən sonra, o ailəyə – xüsusi təyinatlılara məxsus ailəyə daxil olduqdan sonra onun missiyası heç vaxt bitmir. Yəni hərbi xidmətdə olub-olmamasından asılı olmayaraq, xidmətə yararsız olub mülki həyata qayıtsa belə, o missiya hər zaman davam edir.
Sədaqətim şərəfimdir. Şücaət bizim hər zaman şüarımızdır ki, vətənə, millətə olan vəfanı və borcumuzu hər zaman şərəf bilmişik. Xüsusi təyinatlı qüvvələr, mən inanıram ki, bu gün dünyanın ən inkişaf etmiş ordularının xüsusi təyinatlılarının içində heç geri qalmır, hətta onlardan da irəlidədir".
Fatimə
18:05 30.04.2026
Oxunuş sayı: 12
