“Rüşvət alan müəllimlər də var, rüşvət verən valideynlər də” – Ekspertdən AÇIQLAMA
Məktəblərin işıqlı dəhlizlərində gəzib-dolanarkən, səssizcə vərəqlənən kitabların səsindəki ahəngi duymaq mümkündür. Lakin bu sükutun arxasında, bəzən təmizlik gözləntimizə zidd olan sirlər də gizlənir. Rüşvət parlaq gələcəklərə açılan qapılarda qara ləkə kimi durur. Bütün cəmiyyət olaraq, bu kölgələri təhsilimizin üzərindən qaldırmaq və şagirdlərə əsl, dürüst bir təhsil yolu açmaq bizim borcumuzdur. Elm və Təhsil Nazirliyi isə bu mübarizədə aktiv rol oynayaraq, təhsil sistemində rüşvət hallarının qarşısını almaq üçün qətiyyətli addımlar atır.
Mövzu ilə bağlı təhsil eksperti Rizvan Fikrətoğlu Crossmedia.az-a açıqlama verib:
“Məktəblərdə rüşvət halları tamamilə mövcud deyil”, - demək doğru olmaz. Təbii ki, hər hansı fəaliyyət sahəsində neqativ hallar baş verə bilər. Rüşvət alan müəllimlər də var, rüşvət verən valideynlər də. Lakin bunun geniş yayıldığını düşünmürəm, məhdud çərçivədədir”.
Ekspert məktəblərdə rüşvət halları ilə bağlı reallıqların gözardı edilməməsinin lazım olduğunu bildirib:
“Rüşvətlə mübarizənin ən effektiv üsullarından biri məktəblərdə müntəzəm monitorinqlər aparmaqdır. Şagirdlərin anonim və ya açıq fikirlərini toplamaqla bu prosesi gücləndirmək olar. Bu işdə cəmiyyət də fəal olmalıdır. Əgər neqativ hallar aşkar edilərsə, mütləq aidiyyatı üzrə nazirliyin müvafiq qurumlarına, eləcə də Elm və Təhsil Nazirliyinə bildirilməlidir. Ümumiyyətlə, şagirdlər və valideynlər öz məsuliyyətlərini dərk etməli və rüşvət verməməlidirlər. Rüşvət hər hansı formada qəbul edilərsə, bu, şagirdin öz ziyanına olur”.
Elm və Təhsil Nazirliyinin qətiyyətli mübarizəsi ilə birlikdə, biz də təhsilin əsl dəyərini qorumaq üçün səy göstərməliyik. Nəticədə, gələcək nəsillərə ədalətli və şəffaf bir təhsil mühiti bəxş edə bilərik.
Samirə Şərif
12:37 12.12.2024
Oxunuş sayı: 22306
