Pensiya və maaş artımı inflyasiyanın üzərində olmalıdır – Ekspert RƏYİ
Pensiya və əməkhaqqının artırılması insanların rifahını yüksəltməklə yanaşı, iqtisadiyyata da müsbət təsir edir. Artan gəlirlər, insanların daha çox istehlak etməsinə səbəb olur ki, bu da iqtisadi fəallığı artırır. Bəs pensiya və əməkhaqqının artımının iqtisadiyyata və dövlət büdcəsinə təsiri necə qiymətləndirilir?
Mövzu ilə bağlı Crossmedia.az-a danışan iqtisadçı ekspert Eyyub Kərimli, dövlət büdcəsinin bu artımları qarşılamaq üçün balanslı və dəqiq tədbirlər görməsinin vacibliyini vurğulayıb.
“Pensiya və əməkhaqqının artırılması ümumi iqtisadi fəallığın yüksəlməsinə səbəb olur. Gəlirlər artdıqca, tələblər də artır ki, bu da insanların rifahı üçün müsbət haldır,” - deyə ekspert bildirib.
İqtisadçı qeyd edib ki, pensiya və maaş artımı inflyasiyanın üzərində olmalıdır. Bu, qiymətlərin yüksəlməsi nəticəsində insanların alıcılıq qabiliyyətinin azalmasının qarşısını almaq və həyat standartlarına müsbət təsir göstərmək baxımından əhəmiyyətlidir:
“Lakin pensiya və maaş artımı inflyasiyadan daha yüksək olmalıdır ki, qiymət artımı inflyasiyanın təsiri ilə tarazlaşmasın. Bu, insanların həyat səviyyəsinə müsbət təsir edir və eyni zamanda iqtisadi inkişafı tələb edir. Artan tələb, təklifi stimullaşdırır və bu da biznesin həm xidmət, həm də istehsalat sektorunda daha aktiv fəaliyyət göstərməsinə səbəb olur. Ümumilikdə, bu proses ölkənin biznesi və iqtisadiyyatının inkişafına müsbət təsir edir və fayda gətirir.”
Samirə Şərif
09:17 12.12.2024
Oxunuş sayı: 27893
