Yol Fondunda planlaşdırma və xərc uyğunsuzluqları aşkar edilib
Hesablama Palatası Yol Fondunda planlaşdırma və xərc uyğunsuzluqları aşkar edib.
Crossmedia.az xəbər verir ki, Hesablama Palatası “Avtomobil Yolları” Məqsədli Büdcə Fondunun 2024-cü il üzrə gəlir və xərclərini təhlil edərkən proqnozlaşdırma, xərclərin təsnifatı və vəsaitlərin istifadəsi ilə bağlı bir sıra nöqsanlar müəyyən edib.
Məlumata görə, 2024-cü ildə Fondun gəlirləri 330 mln. manat proqnoza qarşı 506,4 mln. manat və ya 153,5% səviyyəsində icra olunub. Bununla yanaşı, bəzi gəlir mənbələri üzrə proqnozlar düzgün hesablanmayıb. Belə ki, yük daşımalarının sadələşdirilmiş vergi öhdəliyindən çıxarılması nəzərə alınmadan proqnoz tərtib edilib, həmçinin gəlir mənbələri siyahısından çıxarılmış dövlət rüsumu üzrə 8 mln. manat proqnoz təsdiqlənib və 5,3 mln. manat icra olunub.
Hesablama Palatası qeyd edib ki, Fond vəsaitləri əsasən cari xərclərə yönəldilsə də, büdcə sənədlərində bu vəsaitlər tam həcmdə əsaslı xərclər kimi göstərilib. Eyni zamanda, qaydalarda nəzərdə tutulmadığı halda 2024-cü ildə Fondun vəsaitlərindən 19,6 mln. manat bank kreditləri üzrə ödənişlərə, eləcə də Agentliyin aparatının saxlanmasına vəsait ayrılıb.
Təhlil zamanı müəyyən edilib ki, Agentliyin tabeliyində olan hüquqi şəxslər üzrə gəlir və xərc smetaları tərtib olunmayıb, avtomobil yollarının vahid dövlət reyestri isə indiyədək formalaşdırılmayıb. Bu isə həm yolların dəqiq uçotunu, həm də xərclərin şəffaf proqnozlaşdırılmasını çətinləşdirib.
Məlumata əsasən, 2024-cü ilin sonuna Agentliyin daxili uçotunda uzunluğu 858,4 km olan qara, 5400,9 km olan çınqıl-qırmadaş və 56 km olan torpaq örtüklü yollar qalıb. Qeyri-asfalt yolların xüsusi çəkisinin 35,2% olması isə yol infrastrukturunda problemlərin davam etdiyini göstərib.
Bundan başqa, yol-nəqliyyat hadisələri nəticəsində yol təsərrüfatına 890,7 min manat ziyan dəyib, bunun yalnız 457,4 min manatı və ya 51,3%-i ödənilib.
Hesablama Palatası həmçinin vurğulayıb ki, “İctimai nəqliyyat” Məqsədli Büdcə Fondunun yaradılmasından sonra “Avtomobil Yolları” Məqsədli Büdcə Fondunun gəlir mənbələrinin azalması onun metodoloji aktuallığı ilə bağlı suallar yaradıb.
20:42 21.04.2026
Oxunuş sayı: 54
