Motosiklet sürücüləri niyə daha çox qəza törədir? - Ekspert açıqlayır
Azərbaycanda yol hərəkəti təhlükəsizliyi sahəsində narahatedici tendensiyalardan biri də motosiklet və moped sürücülərinin iştirakı ilə baş verən qəzaların artmasıdır.
Xüsusilə, bu nəqliyyat vasitələrinin idarə olunmasında yol hərəkəti qaydalarına riayət olunmaması ağır nəticələrə səbəb olur və insan həyatını ciddi risk altına qoyur.
Rəsmi məlumatlara əsasən, cari ilin ilk rübü ərzində məhz bu kateqoriyadan olan sürücülərin təqsiri ilə baş verən qəzalar ölüm və xəsarətlə nəticələnib.
Bundan əlavə, Yasamal rayonu, Xətai rayonu və Abşeron rayonu ərazilərində son bir gündə qeydə alınan hadisələr vəziyyətin ciddiliyini bir daha göstərir və sürücülərin məsuliyyətli davranmasının vacibliyini ön plana çıxarır.
Məsələ ilə bağlı nəqilliyyat üzrə ekspert Adil Nəbiyev Crossmedia.az-la öz fikirlərini bölüşüb:
"Bu cür bədbəxt hadisələrin baş verməsinin əsas səbəbləri bir neçə amillə bağlıdır və bu amillər bir-birini tamamlayaraq riski daha da artırır.
İlk növbədə, motosiklet və moped sürücülərinin bir qisminin kifayət qədər təcrübəyə malik olmaması və yol hərəkəti qaydalarını tam bilməməsi qəza ehtimalını yüksəldir, çünki bu nəqliyyat vasitələri sürətli reaksiya və xüsusi idarəetmə bacarığı tələb edir.
Eyni zamanda yüksək sürətə meyl və riskli manevrlər – xüsusilə, avtomobillər arasında hərəkət etmək, qəfil zolaq dəyişmək və təhlükəsiz məsafəni gözləməmək – ən çox rast gəlinən qəza səbəblərindəndir; qoruyucu vasitələrdən, xüsusilə, dəbilqədən istifadə edilməməsi isə baş verən qəzaların nəticələrini daha ağır edir və ölüm hallarının artmasına gətirib çıxarır.
Texniki cəhətdən nasaz və ya qeyri-qanuni motosiklet və mopedlərin istismarı, o cümlədən əyləc, işıqlandırma və digər vacib sistemlərdə problemlərin olması da təhlükəni artıran mühüm faktorlardandir.
Bəzi hallarda nəqliyyat vasitəsinin sərxoş vəziyyətdə idarə olunması sürücünün diqqətini və reaksiya qabiliyyətini zəiflədir və bu da faciəvi nəticələrə səbəb olur.
Bununla yanaşı, digər nəqliyyat vasitələrinin sürücülərinin motosiklet və mopedləri yolda kifayət qədər nəzərə almaması, onların ölçü və hərəkət xüsusiyyətlərini düzgün qiymətləndirməməsi də toqquşma riskini artırır.
Nəhayət, şəhər infrastrukturunun bu nəqliyyat növünə tam uyğunlaşdırılmaması, yəni ayrılmış zolaqların azlığı, yol örtüyünün keyfiyyəti, nişanlanma və işıqlandırma problemləri də ümumi təhlükəsizlik səviyyəsinə mənfi təsir göstərərək bu cür bədbəxt hadisələrin baş verməsinə zəmin yaradır".
Elmir Heydərli
12:15 11.04.2026
Oxunuş sayı: 226
