Sosium
Qaz sızması riskini necə minimuma endirmək olar?
Şirvan şəhərində baş verən partlayış hadisəsi bir daha məişətdə qazdan istifadə zamanı təhlükəsizlik qaydalarına əməl etməyin həyati əhəmiyyət daşıdığını göstərir. Elşad Əzimov küçəsində yerləşən fərdi yaşayış evində qeydə alınan hadisə nəticəsində yaşayış sahəsinə ciddi ziyan dəyib, bir nəfər isə xəsarət alıb. İlkin ehtimallara görə, partlayışa səbəb qaz sızması olub ki, bu da diqqətsizliyin nə qədər ağır nəticələrə gətirib çıxara biləcəyini bir daha xatırladır.
Hadisə zamanı xəsarət alan Şirvan şəhər sakini xəstəxanaya yerləşdirilib və onun daha ixtisaslı tibbi yardım üçün paytaxta təxliyəsi gözlənilir. Fövqəladə xidmət orqanlarının operativ müdaxiləsi nəticəsində ərazidə təhlükəsizlik tədbirləri görülüb, hazırda isə faktla bağlı araşdırmalar davam etdirilir. Bu kimi hadisələr cəmiyyətdə təhlükəsizlik mədəniyyətinin gücləndirilməsinin vacibliyini ön plana çıxarır.
Məsələ ilə bağlı təhlükəsizlik üzrə ekspert Samir Nəbiyev Crossmedia.az-la öz fikirlərini bölüşüb:
"Təbii qaz - metan yanıcı və partlayıcı xüsusiyyətə malikdir. Qaz sızması zamanı havada müəyyən konsentrasiyaya çatdıqda ən kiçik qığılcım belə partlayışa səbəb ola bilər.Partlayış təhlükəsinin qarşısını almaq üçün aşağıdakı qaydalara əməl olunmalıdır:
Mənzildə metan qazını aşkar edən xüsusi detektorlar quraşdırılmalıdır. Bu detektorlar qaz sızmasını müəyyən etdikdə avtomatik olaraq qoruyucu klapan vasitəsilə qazın verilməsini dayandırmalıdır.
Qaz qoxusu hiss edildikdə dərhal elektrik cihazlarını , yəni işıq açarı, rozetka və s. istifadə etmək qadağandır.
Açıq alov mənbələrindən , o cümlədən alışqan, kibrit və s. istifadə edilməməlidir.
Hətta mobil telefonlardan istifadə belə risk yarada bilər. Çünki potensial qığılcım partlayışa səbəb ola bilər. Belə hallarda dərhal məkan tərk edilməli və müvafiq xidmət orqanlarına məlumat verilməlidir.
Bu qaydalara riayət olunması qaz sızması nəticəsində baş verə biləcək partlayışların qarşısını almaqda mühüm rol oynayır".
Elmir Heydərli
17:52 01.04.2026
Oxunuş sayı: 1952
