Sosium
Çin avtomobilləri etibarını itirir
Son illərdə dünyada avtomobil sənayesi sürətlə transformasiya mərhələsinə qədəm qoyub və bu dəyişimin əsas istiqamətlərindən biri də elektromobillərə keçiddir. Ətraf mühitin qorunması, karbon emissiyalarının azaldılması və alternativ enerji mənbələrinə yönəlmə qlobal trendə çevrildiyi bir dövrdə, bir çox ölkələr kimi Azərbaycan da bu prosesin aktiv iştirakçısına çevrilməkdədir. Xüsusilə elektromobillərin idxalının artması bu sahədə yeni mərhələnin başlandığını göstərir.
Cari ilin yanvar ayında Azərbaycana 3,3 milyon ABŞ dolları dəyərində 108 ədəd elektromobilin idxal olunması həm iqtisadi, həm də ekoloji baxımdan diqqətçəkən göstəricidir. Bu dinamika ölkədə alternativ nəqliyyat vasitələrinə marağın artdığını, bazarın isə tədricən yeni texnologiyalara uyğunlaşdığını göstərir.
Belə bir tendensiya yalnız nəqliyyat sektorunun yenilənməsi ilə məhdudlaşmır, eyni zamanda enerji siyasəti, infrastrukturun inkişafı və istehlakçı davranışlarının dəyişməsi kimi bir sıra mühüm məsələləri də gündəmə gətirir. Elektromobillərin sayının artması gələcəkdə Azərbaycan bazarında rəqabət mühitinin formalaşmasına, yeni xidmət sahələrinin yaranmasına və ekoloji tarazlığın qorunmasına təsir edə bilər.
Mövzu ilə bağlı İş Adamları Assosiasiyasının üzvü, nəqliyyat eksperti Orxan Sabiroğlu Crossmedia.az-a açıqlama verib:
"Bildiyiniz kimi, son gömrük qərarı ilə bağlı dəyişikliklər elektromobillərə aid edilmədi və bu avtomobillər hələ də ƏDV-dən azaddır. Ona görə də hibrid və plug in hibrid avtomobillərin ölkəyə gətirilməsi əvvəlki illərə nisbətən azalsa da elektromobillərdə vəziyyət fərqlidir. Lakin cəmiyyətdə elektromobillərə münasibət hələ də fərqlidir. Bir çox insan bu avtomobillərin gündəlik şarj məsələlərinə görə almağı düşünmür.
Ümumiyyətlə, elektromobillər ölkənin avtomobil parkında əsas yeri tutmadığına görə qeyd olunan rəqəmlərin bazara hər hansı bir dəyişikliyi olacağını hesab etmirəm. Dediyim kimi, avtomobillərin sayı bəllidir və nisbətən az yer tutur".
O bildirib ki, Çin istehsalı markalar və ABŞ istehsalı olan "Tesla"ya təlabət daha çoxdur: "Tesla"nın daha çox alınması səbəbləri kimi həm qiymət, həm də ehtiyat hissələri və servis təminatının daha əlçatan olmasıdır deyə düşünürəm. Çin markalarında isə eyni sözü deyə bilməyəcəm, təəssüf ki. Xüsusi premium Çin avtomobillərində son dövrlər yaranan problemlər buna təsirsiz ötüşmür.
Ümumi olaraq deyə bilərəm ki, elektromobil sayında ciddi artım gözləmirəm bundan sonrakı dövrlərdə də. Xüsusi ilə də gömrük qərarı bu il bitəcək və bu avtomobillərə də ƏDV ödəməli olacaqlar".
Ayhan
18:00 19.03.2026
Oxunuş sayı: 325
