Parkinson xəstəliyinin müalicəsi tapılır? - Həkim optimistdir
Yaponiyada induksiya olunmuş kök hüceyrələri – iPS-hüceyrələri əsasında hazırlanmış və Parkinson xəstəliyinin müalicəsi üçün nəzərdə tutulan yeni preparatın istifadəsinə rəsmi icazə verilib. Bu barədə jurnalistlərə ölkənin səhiyyə, əmək və rifah naziri Kenbiçiro Ueno məlumat verib. Onun sözlərinə görə, iPS-hüceyrələri əsasında hazırlanmış iki innovativ preparatın istehsalı və satışı təsdiqlənib.
Məlumata görə, yeni preparatlar kök hüceyrələri texnologiyası əsasında hazırlanaraq xəstələrə transplantasiya edilən sinir hüceyrələri vasitəsilə müalicə imkanları yaradır. Alimlər hesab edirlər ki, bu yanaşma gələcəkdə regenerativ təbabətin inkişafında və bir sıra ağır xəstəliklərin müalicəsində mühüm dönüş nöqtəsi ola bilər.
Məsələ ilə bağlı tibb üzrə fəlsəfə doktoru, həkim onkoloq Fərid Museyibov Crossmedia.az-la öz fikirlərini bölüşüb:
"Öncə onu qeyd etmək istəyirəm ki, son dövrlərdə kök hüceyrələrdən istifadə tibb sahəsində getdikcə daha geniş yayılmaqdadır. Bu üsul həm nevroloji xəstəliklərin, həm də onkoloji xəstəliklərin müalicəsi istiqamətində tətbiq olunmağa başlanmışdır. Lakin qeyd etmək lazımdır ki, bu sahədə aparılan tədqiqatlar hələ də davam edir və bir çox xəstəliklər üzrə tam müalicə üsulu hələ müəyyən edilməyib.
Ümumiyyətlə, sinir hüceyrələrinin özünəməxsus bir xüsusiyyəti var. Bu hüceyrələr bir dəfə bölündükdən sonra artıq yenidən bölünmə qabiliyyətini demək olar ki, itirir və interfaz mərhələsində qalırlar. Məhz buna görə də sinir sistemi ilə bağlı xəstəliklərdən əziyyət çəkən pasiyentlərin tam sağalması çox çətin olur və müalicə prosesi adətən uzun müddət tələb edir. Sizin qeyd etdiyiniz xəstəlik isə əsasən beyin hüceyrələrinin zədələnməsi və dopamin sintezinin azalması nəticəsində yaranan bir prosesdir. Bu səbəbdən həmin xəstəliyin müalicəsi istiqamətində tədqiqatlar təkcə Yaponiyada deyil, dünyanın bir çox ölkələrində davam etdirilir".
O bildirib ki, adətən bu xəstəlik daha çox yaşlı insanlarda müşahidə olunur və xüsusilə 50 yaşdan yuxarı şəxslərdə rast gəlinmə ehtimalı daha yüksəkdir: "Hər bir ölkə öz tibbi standartlarına uyğun olaraq müəyyən dərman vasitələrindən istifadə edir və onların tətbiqinə rəsmi şəkildə icazə verir. Lakin bu xəstəliyin tam müalicəsi hələlik mümkün olmamışdır. Ümid edirik ki, yaxın gələcəkdə aparılan elmi araşdırmalar nəticəsində bu sahədə ciddi irəliləyişlər əldə olunacaq və yalnız Yaponiyada deyil, digər ölkələrdə də bu xəstəliyin daha effektiv müalicə üsulları tapılacaq".
Elmir Heydərli
14:01 09.03.2026
Oxunuş sayı: 58
