Azərbaycanda istilik təchizatında ciddi problemlər – Azəristilik sakinləri dövlətdən narazı salır
Bu gün Azərbaycanda istilik təchizatı sahəsində ciddi problemlər müşahidə olunur ki, bu da həm ofislər, həm də yaşayış məntəqələri üçün əsl narahatlıq doğurur.
Xüsusilə, gündəlik ofislərdə istilik sisteminin soyuq havalarda birdən-birə dayandırılması həm iş proseslərinin fasilə verməsinə, həm də insanların sağlamlıq durumuna ciddi təsir edir. Belə hallar göstərir ki, məsul qurum olan "Azəristilik" işini düzgün qurmayıb.
Məsələ ilə bağlı "Azəristiliy"ə müraciət edildikdə isə vəziyyət daha aydın görünür. Ya bina kooperativdir deyilib məsuliyyəti öz üzərlərində atırlar, ya da məsələ ümumiyyətlə havada qalır.
Bəs niyə istiliklə bağlı məsul qurumlar olduğu halda bu duruma nəzarət edən olmur?
"Azəristiliy"ə müraciət etdikdə isə əhalinin borc iddiası irəli sürülür. İstifadəçilər isə istiliyin yalnız məhdud müddət üçün, məsələn, cəmi 15 gün təmin olunduğunu qeyd edir. Bəs bu borc iddiası niyə yaranıb, buna niyə vaxtında müdaxilə olunmayıb?
Soyuq havalarda istiliyin olmaması sakinlər üçün ciddi narahatlıq yaradır. İnsanlar iş mühitində, ofislərində normal şəraitdə fəaliyyət göstərə bilmir, termal rahatlıq təmin olunmadığı üçün gündəlik iş ritmi pozulur.
Bu vəziyyət yalnız istifadəçilərin şəxsi rahatlığına təsir etmir; həm də ictimaiyyət arasında istilik təchizatı sisteminə olan etibarı sarsıdır. Məsuliyyətin aydın müəyyən edilməməsi, borc və xidmət iddialarının müxtəlif qurumlar arasında “oyun”a çevrilməsi göstərir ki, idarəetmə mexanizmləri ciddi şəkildə təkmilləşdirilməlidir.
İstilik yalnız xidmət deyil, insan hüququdur və hər bir qurum bu hüququ qorumaqla yanaşı, mövsümi və fövqəladə tələbləri də nəzərə almalıdır.
Şübhəsiz ki, bu məsələ dərhal şəffaf və konkret həll tələb edir. İstilik sisteminin dayandırılması və məsuliyyətin qarışıqlığı həm vətəndaşların həyatına təsir edir, həm də şəhər infrastrukturu və sosial sabitlik baxımından ciddi risklər yaradır.
Azərbaycanda belə halların davam etməsi qəbulolunmazdır və məsul qurumlar dərhal konkret addımlar atmalı, sakinlərin və iş yerlərinin əsas ehtiyaclarını təmin etməlidirlər.
Məsələ ilə bağlı Azad İstehlakçılar Birliyinin sədri Eyyub Hüseynov Crossmedia.az-la öz fikirlərini bölüşüb:
"Bunun səbəbi istehlakçı hüquqları məsələsindədir. Ölkədə istehlakçı hüququ məsələsi bərbad vəziyyətdədir. Milli Məclisdəki çıxışımda da dedim ki, istehlakçıların hüquqlarının müdafiəsi haqqında qanun 1995-ci ildə qəbul olunub. Ondan sonra neçə dəyişiklik aparılıbsa hamısı istehlakçının zərərinə olub.
Cəmiyyətdə problem olduqda onun kökünü qanunlarda axtararlar. Çünki cəmiyyəti insanlar yox , qanunlar idarə edir. Qanunlar köhnəlib, onu yerinə yetirən dövlət orqanları neçə ildir fəaliyyət göstərmirlər. Ona görə də istehlakçı hüquqlarının pozulması baş verir. Bunların ilk səbəbi qanunlardadır. Belə hallarda istehlakçının etdiyi ödənişlərdən çıxılmalıdır. Xüsusi yanaşma olmalı, üzr istənilməlidir. İstehlakçılar hara müraciət etsələr də "futbol topu" kimi ora-bura göndərilir.
İstehlakçıların hüquqları müdafiəsi haqqında qanunda göstərilir ki, bazarda şirkətlər istehlakçılara fasiləsiz və keyfiyyətli xidmət etməlidirlər. Lakin kommunal xidmətlərdə fasiləsizlik təmin olunurmu? Cavab isə birmənalı xeyr. Azəristilik də bu problemləri ilə gündəmə gələn qurumlardan biridir. Qış gələn kimi insanlarla bu qurum arasında problemlər yaşanır. Bununla bağlı tək mənim özümə 7-8 müraciət daxil olub. Bu məsələ kökündən həll olunmalıdır".
Göründüyü kimi birlik sədrinin də qeyd etdiyindən də bəlli olur ki, bu problem olduqca ciddi məsələdir. Nəzərə almalıyıq ki, soyuq hava da qorunmaq vasitələrindən də biri də məhz istilikdir. Bu isə olmayanda olduqca ciddi problemlər yaradır. Əhalinin narazılığı artır və aidiyyatı qurumla bağlı daha sərt iddialar ortaya çıxır. Ölkə prezidentinin şəxsən diqqətdə saxladığı məsələyə Azəristiliyin soyuq davranaraq vətəndaşları incitməsi heç yaxşı hal deyil. Bu artıq vətəndaşları dövlətlə üz-üzə qoymaqdır. Bu məsələni biz hazırda təqib edirik. Yaxın vaxtlarda Azəristiliyin rəhbərliyi və bir qrup əməkdaşlarının qanunsuz əməlləri ilə bağlı məlumatları ictimailəşdirərək hüquq-mühafizə orqanlarına müraciət etməyi düşünürük.
17:10 28.02.2026
Oxunuş sayı: 1287
