Humanitar minatəmizləmədə Ukrayna Azərbaycanla əməkdaşlıqda maraqlıdı
Humanitar minatəmizləmə müasir münaqişələrdən zərər çəkmiş ölkələr üçün ən həyati və strateji sahələrdən birinə çevrilib.
Xüsusilə, genişmiqyaslı Rusiya-Ukrayna müharibəsi fonunda bu istiqamətdə beynəlxalq əməkdaşlığın gücləndirilməsi regionların təhlükəsizliyi və mülki əhalinin qorunması baxımından mühüm əhəmiyyət daşıyır.
Bu kontekstdə Ukraynanın Azərbaycandakı səfiri Yuri Qusev ilə ANAMA-nın İdarə Heyətinin sədri Vüqar Süleymanov arasında keçirilən görüş iki ölkə arasında humanitar minatəmizləmə sahəsində tərəfdaşlığın dərinləşdirilməsi baxımından xüsusi önəm kəsb edir.
Görüşdə ötən il Tokioda imzalanmış Əməkdaşlıq Memorandumunun icrası, gələcək birgə layihələr və texnoloji əməkdaşlıq imkanları müzakirə olunub.
Məsələ ilə bağlı hərbi ekspert Ibrahim Rüstəmli Crossmedia.az-la öz fikirlərini bölüşüb:
"44 günlük Vətən müharibəsindən sonra Azərbaycanın üzləşdiyi ən ciddi problemlərdən biri mina məsələsidir. Mina elə bir silahdır ki, onun dağıdıcı təsirini qısa müddətdə aradan qaldırmaq mümkün deyil. Tarixi nümunə olaraq qeyd etmək olar ki, Birinci Dünya Müharibəsi (1914–1918) artıq yüz il əvvəl baş verməsinə baxmayaraq, həmin müharibənin iştirakçısı bəzi dövlətlərin ərazilərində hələ də minalar tam zərəssizləşdirilməyib. Bu, mina təhlükəsinin nə qədər ciddi olduğunu göstərir: onu zərəssizləşdirməsən, o sənin üçün daimi təhlükə olaraq qalır.
Azərbaycan bu gün, xüsusilə dağlıq və çətin relyefli bölgələrdə — Kəlbəcər, Laçın, Ağdam və digər ərazilərdə — mina problemi ilə üzləşir. Dövlət tərəfindən təqdim olunan mina xəritələri də tam dəqiq olmadığı üçün, ərazilərin tam təhlükəsizləşdirilməsi hələ də aktualdır.
Bu səbəbdən Azərbaycan mina təmizləmə sahəsində dünyanın bir sıra ölkələri və beynəlxalq təşkilatlarla əməkdaşlıq edir.
Xüsusilə, Türkiyə dövlətinin bu sahədə verdiyi dəstək qeyd olunmalıdır. Buna baxmayaraq, mina probleminin tam həlli uzun, mürəkkəb və maliyyə tələb edən bir prosesdir. Bu prosesdə iştirak edən tərəflərin sayı və yatırılan resurslar artdıqca işin sürəti və effektivliyi artır, lakin asanlıqla həll olunmur.
Azərbaycan və Ukrayna arasında mina təmizləmə sahəsində əməkdaşlıq da mühüm əhəmiyyət kəsb edir. Hər iki ölkə müharibə təcrübəsi yaşamış, vətəndaşlarının həyatını və sağlamlığını mina təhlükəsindən qorumaq baxımından eyni problemlərlə üzləşir. Bu əməkdaşlıq həm Azərbaycan, həm də Ukrayna üçün dəyərli nəticələr verəcək və mina təhlükəsinin aradan qaldırılmasına ciddi töhfə verəcək".
Elmir Heydərli
12:58 20.02.2026
Oxunuş sayı: 590
