Azərbaycandan ucuz və rahat səyahət seçimləri: Populyar məkanlar və qiymət trendləri
Azərbaycandan rahat və ucuz səyahət etmək istəyənlər üçün müxtəlif ölkələr əlçatan seçimlər təqdim edir. Xüsusilə tətil günlərində insanlar istirahət üçün büdcəyə uyğun, rahat ölkələr axtarırlar. Vizaların asan əldə olunması, qısa uçuş məsafəsi və münasib yaşayış xərcləri səyahətçiləri bu istiqamətlərə cəlb edir.
Mövzu ilə bağlı Crossmedia.az-a danışan turizm eksperti Ceyhun Aşurov Azərbaycandan rahat şəkildə səyahət ediləcək ölkələri açıqlayıb.
“Azərbaycandan ən ucuz və rahat səyahət ediləcək ölkələr əlbəttə ki, birbaşa reysin olduğu və vizanın tələb olunmadığı ölkələrdir və yaxud da vizanın asan verildiyi ölkələrdir. Bildiyimiz kimi, bəzi Avropa ölkələrində viza tələbi yoxdur. Monteneqro, Albaniya, MDB məkanında olan ölkələr, Orta Asiya ölkələri viza tələb etməyən ölkələrdir. Lakin xüsusən Azərbaycandan Dubaya, bildiyimiz kimi, Birləşmiş Ərəb Əmirliklərinə viza tələbi yoxdur, həm də təyyarə biletlərindəki qiymətlər həmin istiqamətlərdə səyahətləri artırmış olur. Əlbəttə ki, biz bura Maldivi də əlavə edə bilərik, baxmayaq ki, nisbətən uzaqdır. Şri Lanka istiqaməti, Misir, Doha, Qətər, Türkiyə istiqaməti, Batumi, yaxın ölkələrə səyahətləri biz daha çox görürük.”
Müsahibimiz qeyd edib ki, səyahət qiymətləri turların vaxtına görə dəyişir.
“Qiymətlərində isə ölkə xaricindən əsasən yeni il ərəfəsinə tuş gələn turlar: Doha, Dubay, Maldivlərdir. Bu ölkələrin adambaşı qiymətləri 500-1000 dollar arasında dəyişir, əsasən 3 gecə 4 günlükdür və təyyarə qiyməti daxildir.”
Ekspert ölkə xaricinə çıxa bilməyən vətəndaşlar üçün də təkliflərini bildirib.
“Amma ölkə daxilində də təbii ki, yeni il təklifləri var. Burada müxtəlif qiymətlər mövcuddur. Ölkə daxilindəki qiymətlərdə yeni il şənliyi olduqda sadəcə 2 nəfərlik qiymətlər 1000 manatdan başlayır və 2000 manata qədər gəlir.”
Ceyhun Aşurov sonda qeyd edib ki, sırf ölkə xaricinə daha çox populyar turlar Dubay, Doha, Maldiv, Batumi və bəzi Avropa ölkələridir.
Saida Ramazanova
14:40 05.12.2024
Oxunuş sayı: 23261
