Azərbaycanla Özbəkistan arasında qarşılıqlı əməkdaşlıq üçün yeni perspektivlər açılır -RƏY
Azərbaycan və Özbəkistan arasında iqtisadi əməkdaşlıq strateji əhəmiyyət kəsb edən mərhələyə qədəm qoymaqdadır. İkitərəfli münasibətlərin möhkəmləndirilməsi yalnız diplomatik dialoqla deyil, həm də real iqtisadi layihələrin və investisiya təşəbbüslərinin təşkili ilə ölçülür.
Bu kontekstdə Özbəkistanın Azərbaycandakı səfiri Bahrom Aşrafxanovun açıqlamasına görə, iki ölkənin müəssisələri və biznes dairələri arasında birgə layihələrin həyata keçirilməsi üçün 10 milyard ABŞ dolları həcmində investisiya paketi formalaşdırılır. Eyni zamanda, ticarət dövriyyəsinin 1 milyard dollara çatdırılması məqsədi qarşıya qoyulub. Bu təşəbbüslər ölkələr arasında əməkdaşlıq yol xəritəsi çərçivəsində, Ali Dövlətlərarası Şuranın iclaslarına hazırlıq, sahəvi forumlar və elmi ictimaiyyətin görüşləri vasitəsilə davamlı olaraq inkişaf etdirilir.
İkitərəfli əlaqələrlə bağlı ReAL partiyasının sədri, iqtisadçı - ekspert Natiq Cəfərli Crossmedia.az-la öz fikirlərini bölüşüb: "Bu məsələ uzun müddətdir müzakirə olunur. Doğrudan da, 10 milyardlıq göstərici çox əhəmiyyətli və perspektivli bir rəqəmdir. Lakin bu, bir və ya iki ilə əldə olunacaq bir nəticə deyil; bu, uzunmüddətli proqnozlara əsaslanan, planlaşdırılmış layihələrin məcmusudur. Belə bir layihə həm Azərbaycan, həm də Özbəkistan üçün ciddi imkanlar yaradır. Bu təşəbbüs qarşılıqlı əməkdaşlıq üçün yeni perspektivlər açır: sənaye müəssisələrinin yaradılması, ticarət əlaqələrinin genişləndirilməsi, turizm sektorunun inkişafı və digər iqtisadi sahələrdə əməkdaşlıq mümkündür. Özbəkistan 40 milyonluq böyük bazardır və Azərbaycan bu bazara daxil olmaq üçün aktiv addımlar atmalıdır. Bunun yolu isə birgə müəssisələrin yaradılmasından keçir. Beləliklə, həm dövlətlərarası əməkdaşlıq güclənir, həm də investisiyalarda qarşılıqlı fayda təmin olunur".
Elmir Heydərli
11:37 06.02.2026
Oxunuş sayı: 455
