Türk Dünyası
TDT gələcəkdə hərbi sahədə ciddi əməkdaşlıq modeli yaradacaq - RƏY
Xəzər hövzəsində formalaşan yeni geosiyasi reallıqlar, enerji marşrutları uğrunda rəqabət və Avrasiya məkanında dəyişən güc balansı Azərbaycan–Qazaxıstan münasibətlərini strateji müstəviyə çıxarıb. Bakı ilə Astana arasında müttəfiqlik xarakteri daşıyan əməkdaşlıq təkcə ikitərəfli maraqlarla məhdudlaşmır, regional sabitliyin, nəqliyyat-logistika təhlükəsizliyinin və çoxqütblü beynəlxalq sistemdə qarşılıqlı dayaqların formalaşdırılmasına xidmət edir. Məhz bu kontekstdə Qazaxıstanın Azərbaycanla münasibətləri xarici siyasət prioritetləri sırasında ön plana çıxarması təsadüfi deyil.
Bu əməkdaşlıq Qazaxıstan üçün Xəzər üzərindən dünya bazarlarına çıxış imkanlarının genişlənməsi, enerji ixracında alternativ marşrutların möhkəmlənməsi və Türk dünyası çərçivəsində siyasi-iqtisadi təsir dairəsinin gücləndirilməsi baxımından strateji əhəmiyyət daşıyır. Azərbaycan üçün isə Bakı–Astana xətti Orta Dəhlizin real gücə çevrilməsi, tranzit ölkə statusunun möhkəmlənməsi, enerji və nəqliyyat sahələrində yeni investisiya imkanlarının açılması deməkdir. Qarşılıqlı maraqlara söykənən bu tərəfdaşlıq yaxın perspektivdə regionun siyasi və iqtisadi arxitekturasına ciddi təsir göstərə biləcək əsas faktor kimi dəyərləndirilir.
Məsələ ilə bağlı siyasi şərhçi Pərviz Mirizada Crossmedia.az-a açıqlama verib:
"Qazaxıstan xarici işlər naziri Murat Nurteleunun ölkəsinin Azərbaycanla müttəfiqlik münasibətlərin əhəmiyyətindən danışması hesab edirəm ki, mövcud yeni geosiyasi və geoiqtisadi dinamikanın qanunauyğunluğunun göstəricisidir. Rəsmi Bakı və Astana arasında dövlətlərarası əlaqələr bütün sahələr uğurlu inkişaf tendensiyasına malikdir. Xüsusilə, hər iki ölkə liderinin mütəmadi olaraq qarşılıqlı səfərlər təşkil etməsi və mehriban dostluq münasibətləri mövcud dinamikanı gücləndirən əsas faktorlar sırasındadır. Qazaxıstan Orta Asiya regionunun iki siyasi və iqtisadi lokomotivindən biridir. Ölkənin zəngin təbii sərvətləri və geniş coğrafiyası hazırda beynəlxalq investorların, xüsusilə, qərb biznes simalarının diqqət mərkəzindədir. Lakin ölkə uzun müddət Çin və Rusiya arasında sıxılmış vəziyyətdə olduğu üçün potensialını tam şəkildə icra edə bilməmişdir. İndi isə Azərbaycanın Cənubi Qafqazda formalaşdırdığı geosiyasi konfiqurasiya Qazaxıstan üçün Qərb kontenentalına çıxış imkanı qazandırır. Yəni, daha böyük bazarlara çıxış perspektivləri nəzərdə tutulur. Bu səbəbdən Azərbaycanın istər siyasi, istərsə də coğrafi mövqeyi Qazaxıstan üçün əvəzsiz şansdır. Eyni zamanda, qlobal müstəvidə ölkələrin qarşılaşdığı təhlükəsizlik çağırışları ölkələrimizi vahid platformada fəaliyyət göstərməyə sövq edir. Bu isə Türk Dövlətləri Təşkilatıdır. Hazırda siyasi və iqtisadi portfel üzərindən işini quran təşkilat böyük ehtimalla gələcəkdə hərbi sahədə ciddi əməkdaşlıq modeli yaradacaq".
Ayhan
09:34 30.01.2026
Oxunuş sayı: 2417
