Dövlət proqramları niyə icbari tibbi sığorta paketinə çevrilmir?
Azərbaycanda səhiyyə sisteminin maliyyələşdirilməsi və əhalinin tibbi xidmətlərə çıxış imkanlarının genişləndirilməsi dövlət siyasətinin əsas prioritetlərindən biri olaraq qalır. Son illərdə tətbiq edilən icbari tibbi sığorta mexanizmi bu sahədə mühüm islahat kimi qiymətləndirilir. Milli Məclisin Səhiyyə komitəsinin sədri Əhliman Əmiraslanovun da qeyd etdiyi kimi, səhiyyə ilə bağlı dövlət proqramlarının icbari tibbi sığorta hesabına həyata keçirilməsi sistemin davamlılığını təmin etməklə yanaşı, vətəndaşların keyfiyyətli tibbi xidmətlərdən istifadəsinə şərait yaradır. Bu baxımdan dövlət proqramları ilə icbari tibbi sığortanın uzlaşdırılması müasir səhiyyə modelinin formalaşmasında mühüm rol oynayır.
Mövzu ilə bağlı Crossmedia.az-a danışan professor, tibb elmləri doktoru Adil Qeybulla bildirib ki, dövlət proqramlarının icbari tibbi sığorta paketinə çevrilməsi birbaşa maliyyə imkanlarından asılıdır.
Onun sözlərinə görə, dünya praktikasında onkoloji xəstəliklərin müalicəsi səhiyyə büdcəsinin çox böyük hissəsini əhatə edir: “Bütün dünyada onkoloji və bədxassəli şiş xəstəliklərinin müalicəsi icbari tibbi sığorta və səhiyyəyə ayrılan vəsaitin 40 faizindən çoxunu təşkil edir. Bu halda sual yaranır: bizdə onkoloji xəstələri dövlət proqramından çıxarıb mövcud sığorta ayırmaları ilə icbari tibbi sığorta paketinə necə daxil etmək olar?”
Professor qeyd edib ki, hazırkı mərhələdə icbari tibbi sığortanın əsasən doğuş və təxirəsalınmaz tibbi yardımı əhatə etməsi belə mühüm nailiyyət sayıla bilər: "Düşünürəm ki, indiki maliyyə imkanları çərçivəsində doğuş və təcili tibbi yardımın qarşılanması belə uğur hesab edilə bilər. Vərəm, şəkərli diabet, onkoloji xəstəliklər, ana və uşaq müalicəsi kimi dövlət proqramlarının icbari tibbi sığorta paketinə keçirilməsi ciddi maliyyə hesablamaları tələb edir. Bütün bu proqramların sığorta paketinə daxil edilməsi yalnız maliyyə imkanları təmin edildikdən sonra mümkündür. Bu məsələlər ən azı bir il əvvəlki statistik göstəricilər əsasında hesablanmalı, daha sonra müvafiq qərarlar qəbul edilməlidir”.
Mehriban Yariyeva
16:22 26.01.2026
Oxunuş sayı: 460
