Azərbaycanlı həkimlər nədən qorxurlar?
Sizdə olan inamı sarsıdacaq bir reallıq var ki, o da Azərbaycanda cərrahiyyə əməliyyatlarının heç də həmişə uğurlu olmamasıdır. Hər bir əməliyyatda möcüzə axtarmaq əvəzinə, reallığı qəbul etmək lazımdır. Nə üçün bəzən fəsadlar qaçılmazdır? Həkimlərimiz bu çətinliklərlə necə mübarizə aparır?
Mövzu ilə bağlı həkim-oftalmoloq Ergün Rəşidəlizadə Crossmedia.az-a verdiyi açıqlamasında bildirib:
“Azərbaycan cəmiyyətində mövcud olan "hər bir əməliyyat mütləq uğurlu nəticələnməlidir" doktrinası artıq bütün mövcud olan sərhədləri aşıb. Xəstələr hər bir cərrahi əməliyyata yalnız bir möcüzə və ya sehrli çubuğun sehri kimi baxır. Anlamalıyıq ki, bu planetdə 8 milyard insan yaşayır və bu 8 milyardın 10 barmağının izi heç kimsədə bir-birinə uyğun gəlmir. Demək ki, biz bu dərəcədə individual və özəl fərdlərik. Bu müstəvidən baxdıqda anlamaq olar ki, hər bir xəstəlik fərqli insanlarda fərqli axara, hər bir cərrahi həll isə fərqli nəticələrə və fəsadlara gətirib çıxarda bilər. Cəmiyyətimizdə olan yanlış bir fikirdə odur ki, cərrahiyyə fəsadsız olmalıdır. Bizdə elmi məruzələrdə yalnız aparılan müalicə və əməliyyatların uğurlu nəticələri haqqında söz açılır, amma Qərbdə əksinə, aparılan tədqiqatlar əməliyyat zamanı baş verən fəsadlara və onların aradan qaldırılması yollarına köklənir”.
Ergün Rəşidəlizadə bildirir ki, bizim həkimlərimiz fəsadları dilə gətirməkdən ehtiyat edirlər, çünki cəmiyyətin qınağına tuş gələcəklərindən və bunun reputasiyalarına təsir edəcəyindən qorxurlar:
“Bu düşüncə tərzi ilə getsək, heç bir insan ölməməlidir, imtahan verən tələbələrin hamısı universitetə daxil olmalıdır və sairə. Amma real həyat belə deyil. Əksər hallarda fəsadlaşmanın səbəbi həkim səhvi yox, orqanizmin və patoloji vəziyyətin xüsusiyyətləri olur. Belə hallarda hər bir həkim dünyada mövcud olan protokollardan və öz təcrübəsindən yararlanaraq hər bir fəsadlaşmanın aradan qaldırılmasını 2, 3 və daha artıq əməliyyat və müalicə prosedurlarına əl atmalıdır ki, xəstədə lazımi nəticəni əldə etsin. Bu yanaşma Azərbaycana özəl deyil, ümumdünya praktikasıdır. Təbabət cəbr deyil və burada 2+2 həmişə 4-ə bərabər olmur. Bu səhv yanaşma cəmiyyətimizdə davam etsə, əhalimiz yalnız iki şeyə nail olacaq: mütəxəssislərimiz yalnız yüngül xəstələri əməliyyata alacaq və fəsadlı ağır xəstələr əlacsız qalacaq; cavan həkim kadrlarımız isə ölkədən kənarda fəaliyyətlərini davam etdirməyi üstün biləcəklər”.
Samirə Şərif
11:21 02.12.2024
Oxunuş sayı: 13095
