TƏHLÜKƏ BÖYÜYÜR: At ətindən hazırlanan məhsullar satılır - diqqətli olmaq lazımdır
Bəzən gündəlik həyatımızda aldadılma halları gözlənilmədən qarşımıza çıxır. Son vaxtlar valideynlərin diqqətini çəkən hallardan biri bağçalarda uşaqlara təqdim edilən yeməklərlə bağlıdır. Məsələn, “ət qutabı” adı ilə verilən qutabların içində əslində başqa ət növünün olması müşahidə olunur. Uşaqlar bu qutabları sevə-sevə yeyir, valideynlər isə inanaraq onların keyfiyyətinə əmin olur. Bu cür hallar yalnız aldadılma deyil, eyni zamanda təhlükəsizlik və sağlamlıq məsələsini də gündəmə gətirir. İstehlakçılar, xüsusilə də valideynlər, bilmədən uşaqlarına fərqli məhsul təqdim olunduğunu öyrəndikdə ciddi narahatlıq yaşayır. Hər bir valideyn övladının sağlam və düzgün qidalanmasını arzulayır, amma belə hallarda inam zədələnir.
Məsələni daha da düşündürücü edən odur ki, bu cür yanlış təqdimat təkcə bağça səviyyəsində deyil, bazarlarda və qida satışı ilə məşğul olan digər obyektlərdə də müşahidə olunur. Daha ucuz və aşağı keyfiyyətli ət növü bahalı və tanınmış ət adı ilə satıldıqda, insanlar həm maddi, həm də mənəvi olaraq aldadılmış olurlar.
Belə vəziyyətlər göstərir ki, istehlakçı hüquqları və qida təhlükəsizliyi məsələləri yalnız rəsmi sənədlərdə qalmaqla kifayətlənməməli, hər günün reallığında da ciddi nəzarət və şəffaflıq tələb edir.
Bu barədə Crossmedia.az-a açıqlama verən qida məsələləri üzrə ekspert Ağa Salamov qida ilə işləməyən, ətin kimyəvi tərkibini bilməyən hər kəsin fikirlərinə aldanmamalı olduğumuzu vurğulayıb: "At əti son dərəcə təhlükəli bir ət deyil, nə leş ətidir, nə də insanı öldürən bir ət. Bəzən elə SOS siqnalları verilir ki, qida sahəsində işlədiyimə görə öz-özümə şübhə edirəm ki, görəsən mən bu sahədə düz işləməmişəm? At ətinin Azərbaycanda satışı düzgün deyil. Çünki bu, bizim ənənəvi mətbəximizə daxil olmayan bir qida məhsuludur. Yəni, Azərbaycan mətbəxində at əti yoxdur. Yeyilərsə, insanı öldürərmi? Xeyr. Əgər Azərbaycanda qida təhlükəsizliyinin şəffaf nəzarəti altında və ya hər hansı bir sahibkarın at ferması varsa, böyüdülməkdə və kökəldilməkdə olan sürülərə daxil olan atlar varsa və həmin şəxs sadəcə kökəldir, kəsib ətini satırsa o zaman onun ətini, “at əti” adı altında satılan hər bir məhsulu kim istəsə alıb yeyə bilər. Hətta at ətinin faydası da var".
Ekspert həmçinin qeyd edib ki, “At əti” adı altında qutabın içinə gətirib insanlara satmaq birbaşa istehlakçı hüquqlarının pozulmasıdır və istehlakçıların aldadılmasıdır: "Burada cinayət işi də var. Bunun üçün təbii ki, dövlətin yaratdığı qida təhlükəsizliyinə nəzarət edən qurum var. Gedirlər, aşkarlayırlar, şahid nümunələr götürülür. Nümunə götürüldükdən sonra analizlər aparılır və bəlli olur ki, laboratoriyada at ətinə rast gəlinir. O zaman deyirlər ki, bu, mal əti və ya dana əti deyil, bu, at ətidir. O zaman artıq sahibkarın işi ilə bağlı tədbir görülür: inzibati cəza olur, bunu dövlət səviyyəsində həll edirlər".
A.Salamovun sözlərinə görə, bu gün ənənəvi mətbəximizə daxil olmayan at əti və ya hər hansı ət məhsulları satışa buraxılırsa, mütləq şəkildə etiketin üzərində həmin məhsulun hansı ət olduğu: "Əgər donuz ferması ilə məşğuldurlarsa və ya at ferması ilə məşğuldurlarsa, yazmalıdırlar ki, “Məndə at əti satışı var, kim istəyir alsın, yesin”, “Mən at qutabı satıram, kim istəyir alsın, yesin". Amma at qutabı satan adam baytar nəzarətindən keçmiş atların ətini satmalıdır. Elə bir ferma isə Azərbaycanda yoxdur. Və yaxud da xaricdən at əti idxal olunur, bu adam satır, üstündə etiketini yazır və ya menyuya qoyur ki, kim istəyir alsın. Bu işə heç kim qarışa bilməz. Lakin istehlakçı hüququnun pozulması yol verilməzdir. Əgər sən at ətini gətirib mal əti kimi satırsansa bu yol verilməzdir".
Fatimə Məmmədova
09:30 24.01.2026
Oxunuş sayı: 547
