ABŞ-nin növbəti hədəfi İran və Danimarka ola bilər
ABŞ-nin Venesuelaya endirdiyi hava zərbələri nəticəsində mülki şəxslər və hərbçilər də daxil olmaqla azı 40 nəfər həyatını itirib. Bu barədə The New York Times qəzeti Venesuelanın yüksək vəzifəli rəsmisinə istinadən məlumat yayıb.
Crossmedia-az xəbər verir ki, The Guardian Venesuelada baş verən son hadisələr bir sıra ölkələrin hökumətlərində ciddi narahatlıq yaratdığını qeyd edib. Qəzetin məlumatına görə, mümkün növbəti gərginlik ocaqları kimi xüsusilə İran və Danimarkanın adı çəkilir. Analitiklər hesab edirlər ki, ABŞ-nin regionda artan hərbi-siyasi fəallığı yeni qarşıdurma risklərini gündəmə gətirir.
ABŞ Prezidenti Donald Tramp daha əvvəl İranın nüvə proqramı ilə bağlı Tehrana qarşı sərt tədbirlərin görülə biləcəyini istisna etmədiyini açıqlayıb. Eyni zamanda, Tramp administrasiyası Danimarkanın tərkibində olan Qrenlandiya ilə bağlı verdiyi açıqlamalarla da beynəlxalq diqqəti üzərinə çəkib.
Mövzu ətrafında diqqət çəkən digər məqam isə Ağ Evin Baş Qərargah rəisinin müavini Stiven Millerin həyat yoldaşı Keti Millerin paylaşımı olub. O, ABŞ bayrağının rənglərində tərtib edilmiş Qrenlandiya xəritəsini “tezliklə” qeydi ilə sosial şəbəkədə paylaşaraq geniş müzakirələrə və müxtəlif reaksiyalara səbəb olub.
19:34 04.01.2026
Oxunuş sayı: 3709
