Kaya Kallas və Marko Rubio Venesueladakı vəziyyəti müzakirə ediblər
Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas ABŞ dövlət katibi Marko Rubio ilə Venesueladakı mövcud vəziyyəti müzakirə edib. Bu barədə Kallas sosial şəbəkə X hesabında paylaşım edib.
Crossmedia.az xəbər verir ki,Kaya Kallas bildirib ki, Avropa İttifaqı Venesuelada baş verən prosesləri yaxından izləyir. Onun sözlərinə görə, Aİ ölkədəki siyasi vəziyyətlə bağlı ciddi narahatlıq keçirir və Venesuela prezidenti Nikolas Maduronun hakimiyyətinin “yetərli legitimliyə malik olmadığını” hesab edir.
Aİ diplomatiyasının rəhbəri vurğulayıb ki, Brüssel demokratik prinsiplərə, azad və ədalətli seçkilərin keçirilməsinə, eləcə də Venesuela xalqının iradəsinin təmin olunmasına önəm verir. Müzakirələr zamanı tərəflər regionda sabitliyin qorunması və siyasi böhranın sülh yolu ilə həlli imkanları ətrafında da fikir mübadiləsi aparıblar.
Qeyd edək ki, Venesueladakı daxili siyasi gərginlik və beynəlxalq reaksiyalar son dövrlər daha da artıb. Avropa İttifaqı və ABŞ məsələ ilə bağlı mövqelərini koordinasiya etməyə davam edirlər.
Nastya Qəniyeva
17:15 03.01.2026
Oxunuş sayı: 3247
