Uşaqların içində yığılan qəzəb partlayır: Valideynlərin susdurduğu emosiyalar faciəyə aparır
İnsanların, xüsusilə də yetkinlik yaşına çatmayan uşaqların aqressiv davranışları ilə bağlı Crossmedia.az-a açıqlama verən Ailə və uşaq psixoloqu Aynur İsmayılova vurğulayıb ki, elm və texnika inkişaf etdikcə insanların həyatı asanlaşsa da, emosiyaları idarə etməkdə çətinliklərin artmasının əsas səbəblərindən biri uşaqlıqdan hisslərin düzgün izah edilmədən susdurulmasıdır:
" Valideynlər övladlarına "niyə susmalı olduqlarını" başa salmadan davranış tətbiq etdikdə, uşaq emosiyalarını basdırmağı öyrənir. Bu basdırılmış aqressiya isə zamanla yığılıb, ən adi situasiyalarda belə qəfil partlayışlara səbəb ola bilir.Empatiya hissinin zəifləməsi də ailədə formalaşan bir problemdir. Bəzi ailələrdə uşaqlar ən kiçik səhvlərinə görə belə sərt danlanır və onların hisslərini ifadə etməsinə imkan verilmir. Yeniyetməlik dövründə də duyğuların basdırılması nəticəsində yetkinlik yaşında insan daxilində toplanmış emosional gərginliklə yaşayır. Bu səbəbdən insanlar bəzən heç aqressiya tələb etməyən vəziyyətlərdə belə əsəbi reaksiya göstərə bilirlər".
Psixoloq bu aqressiyanın əsas kökünün çox zaman ailədən gəldiyinj və partlayışdan sonra əksər hallarda insanlarda peşmanlıq yaratdığını vurğulayıb:
"Lakin emosiyaları idarə etmək mümkündür. Bir neçə dəfə aqressiya partlaması yaşayan şəxslər psixoloji dəstək alaraq öz hissələrini tanımağı və onları nəzarətdə saxlamağı öyrənsələr, bu cür problemlərin qarşısını almaq olar”.
Fatimə Məmmədova
14:20 22.12.2025
Oxunuş sayı: 1135
