TDT ölkələri arasında media sahəsində əməkdaşlıq güclənir - RƏY
Azərbaycan Respublikasının Medianın İnkişafı Agentliyinin İcraçı direktoru Əhməd İsmayılov Türkiyə Respublikası Prezident Administrasiyasının Kommunikasiya İdarəsinin təşkilatçılığı ilə Ankarada keçirilən türk dövlətlərinin dezinformasiya ilə mübarizə forumunda çıxışı zamanı deyib ki, ölkələrimizlə bağlı həqiqətlərin beynəlxalq ictimaiyyətə düzgün şəkildə çatdırılması üçün Türk dünyasının jurnalistləri arasında güclü həmrəyliyə ehtiyac var.
Əhməd İsmayılov vurğulayıb ki, media qurumları peşə borcunu layiqincə yerinə yetirdikcə Türk dünyasının mövqeyi beynəlxalq arenada daha təsirli şəkildə ifadə olunacaq. O qeyd edib ki, dövlətlərin yerləşdiyi regionlarla bağlı real vəziyyətin düzgün təqdim edilməsi və dünya ictimaiyyətinin obyektiv məlumatlandırılması üçün jurnalistlərin həm peşəkarlıq səviyyəsinin, həm də diqqət və məsuliyyətinin artırılması mühüm əhəmiyyət daşıyır.
Türk dövlətləri arasında media sahəsində əməkdaşlığın inkişafı barədə Crossmedia.az-a danışan Bakı Dövlət Universitetinin Multimedia və elektron kommunikasiya kafedrasının müdiri, professor Qulu Məhərrəmli deyib ki, bu, kifayət qədər mürəkkəb məsələdir: "Amma arzu və niyyətlərin özü çox gözəldir. Düşünürəm ki, bu, təbii prosesdir. Ölkələrin tədricən bir-birlərinin problemlərini anlaması, həmin məsələlərin mətbuat səhifələrində işıqlandırılması, media qurumlarının bir-birini tanıması və əməkdaşlığının genişlənməsi olduqca vacibdir. Yalnız bu yolla həmin həmrəyliyə nail olmaq mümkündür. Beynəlxalq aləmə inteqrasiya xüsusi əhəmiyyət daşıyır. Media qurumlarının birgə əməkdaşlığı mühüm rol oynayır. Əlbəttə ki, problemlərin kollektiv şəkildə ifadə olunması da çox vacibdir. Məhz bu yolla arzulanan həmrəyliyə nail olmaq mümkündür".
Fatimə Eynullazadə
11:08 19.12.2025
Oxunuş sayı: 1386
