Bu məhsul barəsində aidiyyəti qurumlar məsuliyyət daşımalıdır - Hüquqşünas
Son dövrlər məktəblilər arasında “snus” adlanan, saqqızı xatırladan və tərkibində tütün olan məhsulun yayılması ciddi narahatlıq doğurur. İlk baxışdan zərərsiz, hətta adi saqqız təsiri bağışlayan bu məhsul uşaqlar və yeniyetmələr tərəfindən təhlükəsiz hesab olunur. Lakin reallıq tam fərqlidir: məktəblilər “snus”un tərkibindəki maddələr, onun sağlamlığa təsiri və yaratdığı asılılıq riski barədə demək olar ki, heç bir məlumata malik olmadan ondan istifadə edirlər. Mütəxəssislərin fikrincə, bu cür məhsulların gizli şəkildə, nəzarətsiz yayılması həm valideynlər, həm də təhsil və aidiyyəti qurumlar üçün ciddi xəbərdarlıq siqnalıdır. Zərərli vərdişlərin erkən yaşlarda formalaşması isə uzunmüddətli sağlamlıq və sosial problemlərə yol aça bilər.
Mövzu ilə bağlı hüquqşünas Ramil Süleymanov Crossmedia.az-a açıqlama verib. Bildirib ki, bu məsələdə ilk növbədə prokurorluq və polis əməkdaşları araşdırma aparmalıdır: ‘’Burada iki əsas qurumun məsuliyyəti ortaya çıxır: Dövlət Gömrük Komitəsi və Qida Təhlükəsizliyi Agentliyi. Sual yaranır ki, bu iki qurum sözügedən məhsulun Azərbaycana buraxılmasını hansı əsaslarla razılaşdırıb. Qida Təhlükəsizliyi Agentliyi bu məhsulla bağlı sertifikat veribmi? Dövlət Gömrük Komitəsi isə həmin sertifikat olmadan, yaxud sertifikat mövcud olduğu halda öz laboratoriyasında müayinə aparmadan məhsulu necə ölkəyə buraxıb? Digər vacib məsələ ondan ibarətdir ki, əgər tərkibində bu tip maddələr olan məhsul satışdadırsa, onun üzərində mütləq şəkildə 18 yaşdan aşağı şəxslərə satışın qadağan olunması ilə bağlı açıq xəbərdarlıq və məlumatlar yer almalıdır. Bu tələblərin olmaması “İstehlakçıların hüquqlarının müdafiəsi haqqında” qanunun kobud şəkildə pozulması deməkdir. Buna görə də həmin məhsulun satışına icazə verən və prosesdə iştirak edən aidiyyəti qurumlar məsuliyyətə cəlb olunmalıdır’’.
Hüquqşünas qeyd edib ki, ümumiyyətlə, bu qəbildən olan məhsulların satışı ilə bağlı ciddi addımlar atılmalı, geniş və açıq şəkildə maarifləndirmə işləri aparılmalıdır: ‘’Bu cür məhsulların zərərləri cəmiyyətə açıq şəkildə izah olunmalıdır. Bugünkü dövrdə müxtəlif yollarla uşaqlardan nəyisə gizlətmək yol verilməzdir. Hətta narkotiklərin məktəblərə qədər yol tapması, uşaqların bilmədən onlardan istifadə etməsi riski nəzərə alınaraq, maarifləndirmə daha da gücləndirilməlidir. Narkotik maddələrin nə olduğu, necə göründüyü və istifadəsinin hansı fəsadlara səbəb olduğu açıq və aydın şəkildə izah edilməlidir. Maarifləndirmə mütləq və sistemli olmalıdır’’.
Sevinc Yarməmmədova
09:31 19.12.2025
Oxunuş sayı: 920
