Sosium

Babək və Şahbuzda idman qurğuları istifadəyə verilib

“Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın icrası uğurla davam etdirilir.

Crossmedia.az xəbər verir ki, Naxçıvan Muxtar Respublikası Gənclər və İdman Nazirliyinin mətbuat xidmətindən bildirilib ki, Dövlət Proqramının 2025–2027-ci illər üzrə Təfsilatlı Tədbirlər Planına əsasən görülmüş işlərin nəticəsi olaraq Babək rayonunun Cəhri qəsəbəsində və Şahbuz şəhərində də sadə tipli açıq hava idman qurğuları istifadəyə verilib.

Dekabrın 17-də Naxçıvan Muxtar Respublikası gənclər və idman nazirinin müavini, nazir vəzifələrini müvəqqəti icra edən Məcid Seyidov, Babək Rayon İcra Hakimiyyətinin başçısı Ovni Muradov və Şahbuz Rayon İcra Hakimiyyətinin başçısı Rəfael Babayevin iştirakı ilə yeni istifadəyə verilmiş açıq hava idman qurğularının təqdimatı keçirilib. Təqdimat zamanı çıxış edən rəsmilər vətəndaşların sağlamlığının qorunması, gənclərin fiziki inkişafı baxımından bu cür infrastruktur layihələrinin əhəmiyyətini vurğulayıb, idman alətlərindən səmərəli və məqsədyönlü istifadənin vacibliyini qeyd ediblər. Yaradılmış şəraitə görə dövlət başçısına minnətdarlıq ifadə olunub.

Qeyd edək ki, Dövlət Proqramına uyğun olaraq sadə tipli açıq hava idman qurğularının istifadəyə verilməsi prosesi muxtar respublikanın bütün rayonlarını əhatə edəcək.(AZƏRTAC)