Daun sindromu tarixə qovuşdu? - Bu həm uşaq, həm də ailə üçün böyük bir yükdür
Son günlər sosial şəbəkələrdə “Daun sindromu artıq yox olub” tipli paylaşımlar sürətlə yayılaraq ictimai müzakirələrə səbəb olub. İddialara görə, güya genetik pozuntu tamamilə aradan qaldırılıb və daun sindromlu uşaqların doğulması artıq mümkün olmayacaq. Lakin mövzunun həssaslığı, tibbi və elmi tərəflərinin çoxqatlı olması belə məlumatların ciddi şəkildə yoxlanılmasını tələb edir. Genetik xəstəliklər sahəsində araşdırmaların sürətlə inkişaf etməsi bir faktdır, lakin bu cür xəbərlərin elmi əsasının olub-olmaması ciddi şəkildə araşdırılmalıdır. Sosial media mühitində informasiyanın tez yayılması bəzən reallıqla şişirdilmiş iddialar arasındakı sərhədi daha da bulanıqlaşdırır.
Mövzu barəsində tibb elmləri doktoru, professor Adil Qeybulla Crossmedia.az-a açıqlama verib. Bildirib ki, daun sindromu genetik bir xəstəlikdir: ‘’Bu xəstəlik zamanı valideynlər tamamilə sağlam genetikaya malik ola bilsələr də, istər sperma, istərsə də yumurta hüceyrəsi vasitəsilə 21-ci xromosomun əlavə nüsxəsi yarananda xəstəlik ortaya çıxır. Hazırda, xüsusilə Yaponiyada, 2025-ci ildə 21-ci xromosom trisomiyasını, yəni artıq xromosomu aradan qaldırmaq üçün müəyyən tədqiqatlar aparılır. Bu istiqamətdə işlər davam edir, lakin problemin tamamilə həll olunduğunu demək hələ mümkün deyil’’.
A. Qeybulla qeyd edib ki, daun sindromu kifayət qədər ağır bir pozuntudur: ‘’Uşağın kognitiv reaksiyalarında ləngimələr olur, əqli inkişaf geridə qalır, ictimai həyata inteqrasiya çətinləşir. Bu həm uşaq, həm də ailə üçün böyük bir yükdür. Təəssüf ki, bu gün də belə uşaqlar dünyaya gəlir. Digər tərəfdən, hamiləliyin müxtəlif trimestrlərində aparılan testlərlə xəstəliyi öncədən müəyyənləşdirmək mümkündür. Bir çox halda, valideynlər məhz belə uşağın doğulmasının qarşısını almaq məqsədilə qərar verirlər. Mən də düşünürəm ki, mümkünsə, doğuşdan əvvəl qarşısının alınması daha yaxşıdır. Amma xəstəliyin tamamilə aradan qaldırılması hələ ki real görünmür’’.
Sevinc Yarməmmədova
16:13 04.12.2025
Oxunuş sayı: 1660
