TDT çərçivəsində ortaq seriallar və uşaq kontenti yaradıla bilər
Qazaxıstan Türk Dövlətləri Təşkilatı (TDT) çərçivəsində media əməkdaşlığının genişləndirilməsi üçün bir sıra təşəbbüslər irəli sürüb. Bu barədə Qazaxıstan mədəniyyət və informasiya nazirinin müavini Kanat İskakov Bakıda keçirilən TDT-nin Media və İnformasiya üzrə məsul nazirlərinin və yüksək vəzifəli rəsmilərinin 7-ci toplantısında bəyan edib.
Məsələ ilə bağlı Crossmedia.az-a açıqlama verən Bakı Dövlət Universtetinin jurnalistika fakültəsinin kafedra müdiri Aynur Nəsirova bildirib ki, “Dövlət səviyyəsində və yaxud maraqlı tərəflərlə razılaşmalar əsasında ortaya çox gözəl iş qoymaq mümkündür: "Bunun gerçəkləşməsi üçün həm siyasi, həm iqtisadi, həm də media infrastrukturu baxımından real imkanlar var. Ortaq mədəni köklərimiz kontent yaratmaq üçün mənbədir. Türk xalqlarının ortaq tarixi və mifoloji xəzinəsi — həm cizgi filmləri, həm də seriallar üçün mövzu mənbəyidir. Son illərdə Türk Dövlətləri Təşkilatı ilə olan mədəni-humanitar sahədə əməkdaşlıq, ortaq media platformalarının – o cümlədən TRT Avaz, “Türk dünyası xəbər xətti”, “Türksoy TV” də birgə kontent istehsalının bazası ola bilər. Yəni kontent üçün əlavə konseptual axtarışa ehtiyac yoxdur".
A.Nəsirova həmçinin qeyd edib ki,
ortaq istehsal üçün hər bir ölkə kino fondu, dövlət sifarişləri, həm də TDT çərçivəsində ayrılan mədəni proqramlar vasitəsilə maliyyə ayıra bilər: "Türkiyə, Azərbaycan və Qazaxıstanda film və serial sektoruna dövlət dəstəyinin olması bu layihələrin maliyyələşməsini təmin edə bilər. Texniki və yaradıcı potensiala gəlincə,
Türkiyə serial sənayesi qlobal bazarda mövqeyini gücləndirib və artıq 150-dən çox ölkəyə kontent ixrac edir. Azərbaycan, Qazaxıstan və Özbəkistanda da son illər kinostudiya və rəqəmsal platformaların inkişafı yaradıcı mühitin genişlənməsinə səbəb olub”.
16:45 29.11.2025
Oxunuş sayı: 1097
