Gürcüstanda C-130 qəzası: Qara qutuların təhlili hərbi aviasiyada təhlükəsizliyi yenidən gündəmə gətirir
Noyabrın 11-də Gürcüstan ərazisində Türkiyəyə məxsus “C-130” hərbi yük təyyarəsinin qəzaya uğraması regionda ciddi rezonans doğurmuş və aviasiya təhlükəsizliyi ilə bağlı sualları artırmışdır. Hadisə nəticəsində təyyarədə olan 20 hərbi qulluqçu həlak olmuşdur. İlkin araşdırmalar təyyarənin bir neçə hissəyə parçalandığını göstərir. Qəzanın səbəblərinin müəyyənləşdirilməsi üçün “qara qutu”ların təhlili aparılır və Türkiyənin milli müdafiə nazirinin açıqlamasına görə, nəticələrin əldə edilməsi ən azı iki ay çəkəcək. Bu hadisə hərbi aviasiyada təhlükəsizlik və texniki nəzarətin vacibliyini yenidən gündəmə gətirir.
Crossmedia.az-a danışan hərbi ekspert Ədalət Verdiyev bildirib ki, Gürcüstan ərazisində qəzaya uğrayan C-130 Herkules hərbi nəqliyyat təyyarəsində iki ədəd qara qutu mövcuddur: “Qara qutulardan biri ekipaj üzvlərinin bir-biri ilə danışıqlarını, digəri isə yerüstü xidmətlər, yəni dispeçer məntəqəsi ilə əlaqələri yazır. Bu məlumatların araşdırılması uzun zaman tələb edir, çünki təyyarənin parametrlərinin ekipajın danışıqları ilə əlaqələndirilməsi mürəkkəb və zaman aparan bir prosesdir".
Ekspert əlavə edib ki, qara qutunun öyrənilməsi və araşdırmaların başa çatması baş vermiş təyyarə qəzasının əsl səbəblərini qəti şəkildə müəyyən etməyə imkan verəcək: “Paralel olaraq Türkiyənin istismarında olan bu markadan olan bütün təyyarələr texniki baxışdan detallı şəkildə yoxlanacaq və hər bir təyyarəyə aid texniki rəy hazırlanacaq. Qara qutudan çıxan nəticələr və Dövlət Komissiyasının təyyarələr üzrə texniki rəyləri nəzərə alınaraq, bu təyyarələrin gələcəkdə istismarının davam etdirilib-edildirilməməsi barədə yekun qərar veriləcək. Əgər qəzanın texniki səbəblərdən baş verdiyi təsdiqlənərsə, həmin təyyarələrin hamısı və ya bir hissəsi istismardan çıxarıla bilər".
Mehriban Yariyeva
21:03 18.11.2025
Oxunuş sayı: 1046
