Azərbaycan Çin şirkəti ilə günəş enerjisi layihəsi üzrə İcra Müqaviləsi imzalayıb - YENİLƏNİB
Azərbaycan Energetika Nazirliyi, Çinin "China Datang Overseas Investment Co. Ltd" və "SOCAR Green" MMC şirkətləri arasında "Azərbaycan Respublikasında 100 MVt gücündə Günəş Elektrik Stansiyası Layihəsinin qiymətləndirilməsi, işlənilməsi və həyata keçirilməsinə dair İcra Müqaviləsi" imzalanıb.
Crossmedia.az Energetika Nazirliyinə istinadən xəbər verir ki, icra müqaviləsi nazir Pərviz Şahbazovla "China Datang Corporation Ltd." şirkətinin Direktorlar Şurasının sədri Lü Cünün başçılıq etdiyi nümayəndə heyəti arasında keçirilən görüşdə imzalanıb.
Məlumata görə, müqavilə layihənin icrasına məsul şirkətin və Rəhbər Komitənin yaradılmasını nəzərdə tutur.
Görüşdə enerji sahəsində geniş əməkdaşlığın Azərbaycanla Çin arasında hərtərəfli strateji tərəfdaşlıq səviyyəsinə yüksəlmiş münasibətlərin əsas prioritet istiqamətlərindən biri olduğu, bu xüsusda Azərbaycan Prezidenti İlham Əliyevin Çinə dövlət səfəri zamanı imzalanan sənədlərin mühüm rolu vurğulanıb.
"China Datang Overseas Investment Co. Ltd" şirkəti ilə quruda 100 MVt gücündə günəş, 2 QVt gücündə dənizdə külək enerjisi, enerji saxlanc sistemi və "Yaşıl Enerji Dəhlizi" layihələrini, həmçinin Azərbaycanın energetika sektoru mütəxəssisləri üçün təlim və təcrübə mübadiləsi proqramını əhatə edən tərəfdaşlıq münasibətlərindən məmnunluq ifadə olunub. Müzakirələr zamanı dəniz külək enerjisi və "Yaşıl Enerji Dəhlizi" layihələrinin həyata keçirilməsi üçün zəruri texniki və iqtisadi məsələlər nəzərdən keçirilib. Aparılmış tədqiqatlar, külək turbinlərinin daşınması və quraşdırılması, avadanlıqların yerli istehsalının təşkili, sualtı kabellər, enerjinin ötürülməsi və sistem tənzimlənməsi kimi istiqamətlər üzrə fikir mübadiləsi edilib.
Həmçinin görüşdə günəş enerjisi sahəsində əməkdaşlığın cari vəziyyəti və perspektivlər dəyərləndirilib.
16:51
Energetika Nazirliyi, Çinin "China Datang Overseas Investment Co. Ltd" və "SOCAR Green" MMC şirkətləri arasında "Azərbaycan Respublikasında 100 MVt gücündə Günəş Elektrik Stansiyası Layihəsinin qiymətləndirilməsi, işlənməsi və həyata keçirilməsinə dair İcra Müqaviləsi" imzalanıb.
Crossmedia.az xəbər verir ki, bu barədə energetika naziri Pərviz Şahbazov "X" sosial şəbəkəsindəki hesabında bildirib.
Nazir qeyd edib ki, "China Datang Corporation Ltd." şirkətinin Direktorlar Şurasının sədri Lü Cün ilə görüşüb.
Görüşdə əməkdaşlıq gündəliyində olan quruda günəş, dənizdə külək enerjisi, enerjisaxlanc sistemi və Yaşıl Enerji Dəhlizi layihələrinin inkişafı barədə müzakirələr aparılıb.
16:51 12.11.2025
Oxunuş sayı: 1274
