"Dabaq"dan sonra mənşəyi məlum olmayan ətlər: Sağlamlığımız təhlükədə!
Azərbaycan Qida Təhlükəsizliyi Agentliyi (AQTA) tərəfindən aparılan yoxlamalar zamanı bəzi ictimai iaşə obyektlərində və şadlıq saraylarında mənşəyi və keyfiyyətinə dair sənədləri olmayan ət məhsullarının istifadə edildiyi müəyyən olunub. Bu hallar insan sağlamlığı üçün ciddi təhlükə yaratdığından, AQTA müvafiq müəssisələrə xəbərdarlıq edərək yalnız baytarlıq arayışı və şəhadətnaməsi ilə təsdiqlənmiş ət məhsullarından istifadə olunmasını tələb edib. Hazırda ölkə üzrə nəzarət tədbirləri gücləndirilib və qanun pozuntularına yol verən obyektlər barəsində inzibati tədbirlər görülür.
Cəmiyyətdə ətlə bağlı SOS siqnalı davam edir. "Dabaq"xəstəliyindən sonra AQTA-nın yaydığı bu məlumat insanları daha da qorxudur.
Qida eksperti Fərid Səfərov Crossmedia.az-a bildirib ki, sözügedən məsələ həm qida təhlükəsizliyi, həm də ictimai sağlamlıq baxımından son dərəcə vacibdir: "Ətin mənşəyi və keyfiyyətinə dair sənədlərin olmaması, həm iaşə müəssisələri, həm də istehlakçılar üçün ciddi təhlükə yaradır. Hər bir məhsulun qanuni və baytarlıq nəzarətindən keçməsi zəruridir. Belə ətlər adətən qeyri-qanuni kəsimlərdən, nəzarətsiz mənbələrdən və soyuq zəncirin pozulduğu şəraitdə əldə olunur. Bu cür hallarda ət Salmonella, E. coli, Listeria və Campylobacter kimi patogen bakteriyalarla çirklənə bilər. Bundan əlavə, heyvanlara kəsimdən əvvəl antibiotik, hormon və ya pestisid verilibsə, bu maddələrin qalığı insan orqanizmində toplanaraq qaraciyər, endokrin və immun sisteminə mənfi təsir göstərir”.
F. Səfərov bildirib ki, ətin daşınması və saxlanması zamanı temperatur rejiminin pozulması da bakteriyaların sürətlə çoxalmasına səbəb olur: “Ətin hər mərhələdə – kəsimdən istehlakçıya qədər – düzgün saxlanması və daşınması vacibdir. Temperatur rejiminin pozulması məhsulun təhlükəsizliyini tamamilə sıradan çıxarır. Restoran, kafe, dönərxana və yeməkxanalar qanunvericiliyə əsasən sənədləşmə, saxlanma və gigiyena tələblərinə ciddi əməl etməlidirlər. Ətin saxlanma temperaturu 0–4°C, dondurulmuş ətin isə –18°C və aşağı olmalıdır. Xam və bişmiş məhsullar ayrı saxlanmalı, müxtəlif səth və alətlərdən istifadə olunmalıdır. İşçilər isə əlcək və qoruyucu geyimlə işləməli, təmizlik qaydalarına riayət etməlidirlər”.
Müsahibimiz həmçinin söyləyib ki, AQTA -nın apardığı mütəmadi monitorinqlər bu qaydalara əməl olunub-olunmadığını müəyyənləşdirmək məqsədi daşıyır: “Mənşəyi bəlli olmayan ət məhsullarından istifadə inzibati cərimələrə, obyektin bağlanmasına, hətta cinayət məsuliyyətinə səbəb ola bilər. İaşə müəssisələri həm hüquqi, həm də mənəvi baxımdan istehlakçının sağlamlığının qorunmasına görə məsuliyyət daşıyır. Sağlam qidalanma və təhlükəsiz məhsul istehlakı cəmiyyətin ümumi rifahına birbaşa təsir edir. Sağlam qidalanmaq sağlam gələcəyin təminatıdır. Hər bir vətəndaş aldığı məhsulun mənşəyinə diqqət yetirməli, müəssisələr isə məsuliyyətli davranmalıdır”.
Mehriban Yariyeva
13:20 06.11.2025
Oxunuş sayı: 1513
