ABŞ ilə Rusiya arasında siyasi razılaşma: Vaşinqton bunun əvəzində Zelenskiyə təzyiqi artıracaq
Rusiya Prezidenti Vladimir Putinlə ABŞ lideri Donald Tramp arasında telefon danışığı uzun, səmimi və faydalı olub.
Bu barədə Rusiya prezidentinin köməkçisi Yuri Uşakov danışıb.
Uşakov jurnalistlərə deyib: "Telefon danışığı uzun idi, təxminən iki saat yarım davam etdi. Bu, çox məlumatlı və eyni zamanda son dərəcə səmimi və məxfi idi".
Onun sözlərinə görə, liderlər geniş spektrli məsələləri müzakirə ediblər və əlaqələri davam etdirmək barədə razılığa gəliblər.
"Ümumilikdə deyərdim ki, Rusiya və ABŞ prezidentləri arasında telefon əlaqəsi çox faydalı oldu və iki lider əlaqə saxlamağa razı oldular", - deyə prezidentin köməkçisi qeyd edib.
Uşakov əlavə edib ki, Putin və Tramp şəxsi görüşün mümkünlüyünü müzakirə ediblər: "Bu, həqiqətən də, çox vacib məqamdır. Razılığa gəlindi ki, iki ölkənin nümayəndələri dərhal, məsələn, Budapeştdə keçirilə biləcək sammitə hazırlaşacaqlar".
Rusiya və ABŞ liderlərinin telefon danışığı uzun zamandır gözlənilirdi. Həm də ona görə ki, vütün cəhdlərə baxmayaraq, Şərqi Avropadakı "düyün açılmır". İki lider- Trampla Putin ya bir - birilərini başa düşmür, ya da bunu ümumiyyətlə istəmirlər.
Telefon danışığının ikitərəfli münasibətlərin perspektivinə təsiri barədə Crossmedia.az-a danışan siyasi şərhçi Zeynal Əmrəliyev bildirib ki, Tramp Ukrayna məsələsində mövqeyini dəyişir: "ABŞ və Rusiya prezidentlərinin telefon danışığındakı əsas müzakirə mövzusu məhz Ukrayna məsələsidir. Burada biz yenidən Trampın ilin əvvəlindəki ritorikasına qayıtmasının şahidi oluruq. Tramp ilin əvvəlində müəyyən qədər Rusiyanın xeyrinə açıqlamalar verirdi və Ukraynanın sülhə məcbur edilməsi prosesini təkrarlayırdı. Yəni Ukraynanın, daha doğrusu, kapitulyasiyaya gəlməsinə çalışırdı. Yenidən müəyyən qədər həmin fikirlərin şahidi oluruq ki, bu, təəssüfləndirici faktlardır. Yəni bu, normal fikirlər deyil və ümumilikdə ABŞ-nin bu cür mövqe sərgiləməsi Ukraynada heç də sülhün əldə edilməsinə gətirib çıxaracaq bir məsələ deyil. Bu, eyni zamanda, ABŞ-ni özünün ənənəvi müttəfiqləri olan Avropa ölkələrindən, Avropa İttifaqından da qoparacaq bir məsələdir. Çünki Avropa İttifaqı bir tərəfdən Ukraynaya yardım göstərir, amma ABŞ faktiki olaraq, prosesə mane olur. İndi raketlərin verilməsi ilə bağlı Tramp əvvəl səsləndirdiyi mövqedən artıq imtina edir. Bu, öz- özlüyündə çox mənfi tendensiyadır və demək olar ki, Qərb cəbhəsində parçalanma yarada bilər. Hansı ki, ilin əvvəlində belə bir hadisə olmuşdu. Daha sonra Trampın Rusiyaya qarşı münasibətinin dəyişməsi fonunda biz bunun müsbətə doğru dəyişdiyinin şahidi olduq. Amma yenidən eyni ritorika davam edir. İndi Budapeştdə görüş keçiriləcəksə, biz Budapeşt görüşündən sonra artıq tərəflərin hansı istiqamətdə addımlar atmasının şahidi olacağıq. Ehtimal ki, Tramp Budapeşt görüşündə Putindən Ukraynadakı müharibənin dayandırılmasını istəyəcək. Bunun necə dayandırılmasının fərqi olmayacaq. O, həmçinin Kreml rəhbərindən Çinə qarşı əks mövqe nümayiş etdirilməsini istəyəcək".
Ekspert söyləyib ki, son zamanlar Pekinlə Moskva arasındakı münasibətlər olduqca yüksək səviyyədədir və bu, Vaşinqtonu ciddi şəkildə narahat edir: "ABŞ xüsusilə Trampın dövründə Çinlə nəinki iqtisadi rəqabət, hətta müharibə şəraitindədir. Bu da ABŞ-də qıcıq yaradır. Tramp bu məsələ ilə bağlı Putindən istəyini tələb edəcək. Əvəzində isə biz yenidən Zelenski komandasına Tramp administrasiyası tərəfindən təzyiqin şahidi olacağıq".
Günel Verdiyeva
20:49 17.10.2025
Oxunuş sayı: 1492
