Həkimlə müsahibə: Üç yaşına qədər uşaqlara ekrana baxmaq məsləhət görülmür, çünki... - ANONS
Uşaqların sağlam inkişafı valideynlər üçün ən mühüm məsələlərdən biridir. Bu inkişafda sinir sisteminin rolu isə xüsusilə önəmlidir. Müasir dövrdə texnologiyanın təsiri, hamiləlik dövründə rast gəlinən risklər, doğuş zamanı çətinliklər və digər amillər uşaqlarda müxtəlif nevroloji problemlərin yaranmasına səbəb ola bilir.
Valideynlərin bu problemləri vaxtında tanıması və erkən diaqnozun qoyulması uşağın gələcək həyat keyfiyyəti üçün həlledici əhəmiyyət daşıyır.
Bütün bu məsələlər barədə geniş məlumat almaq üçün uşaq nevroloqu Elşən Qarayev "Doktor danışır" rubrikası çərçivəsində Crossmedia.az-a geniş müsahibə verib.
O, uşaqlarda yaranan nevroloji problemlərin yaranmasında olan əsas səbəbləri, onun həlli yolları barədə öz fikirlərini bölüşüb.
Müsahibədən əsas fikirləri təqdim edirik:
"Erkən diaqnoz həyati əhəmiyyət daşıyır. Uşaqlarda nevroloji problemlər vaxtında aşkar edilərsə, reabilitasiya və müalicə daha təsirli olur, uşağın gələcək həyat keyfiyyəti yüksəlir" .
"Ən çox risk hamiləlik və doğuş dövründə yaranır. Ananın xəstəlikləri, hamiləlikdə problemlər, doğuş çətinlikləri və infeksiyalar uşaqlarda nevroloji xəstəliklərin əsas səbəblərindəndir" .
"Texnologiyanın həddindən artıq istifadəsi zərərlidir. Üç yaşına qədər uşaqlara ekrana baxmaq məsləhət görülmür; sonrakı yaşlarda da məhdudiyyət və valideyn nəzarəti vacibdir. Çünki bu, sosial, nitq və diqqət bacarıqlarına mənfi təsir göstərir".
"Alternativ məşğuliyyətlər vacibdir. Uşağın sevdiyi idman, musiqi və ya yaradıcılıq fəaliyyəti onun psixoloji və nevroloji inkişafı üçün həm faydalıdır, həm də ekran asılılığını azaldır".
"Valideynlərin davranışı həlledicidir. Sağlam ailədaxili mühit, nümunəvi davranış, normal yuxu rejimi və uşağın sosiallaşmasına dəstək nevroloji sağlamlığın qorunmasının əsas “qızıl qaydalarıdır”.
Müsahibə yaxın günlərdə saytımızda dərc olunacaq.
Elmir Heydərli
16:25 03.10.2025
Oxunuş sayı: 5897
