Həkim deputatın fikirlərinə münasibət bildirdi: “Müəyyən çətinliklər var, lakin…”
Milli Məclisin Regional məsələlər komitəsinin sədri Siyavuş Novruzov
parlamentin bugünkü plenar iclasında deyib ki, icbari tibbi sığortanın sənədləşmə
prosesi sadələşdirilməlidir.
O qeyd edib ki, vətəndaş aidiyyəti qurumla xəstəxana arasında
qalmamalıdır: "Çünki insanlar müalicəyə gedirlər və sənədləşmə prosesinin
asan olması vacibdir".
Komitə sədri, həmçinin bildirib ki, bəzi xəstəxanaların qiyməti az qala
hotel qiyməti ilə eynidir.
"İcbari tibbi sığorta əməliyyatın və həkimin xərclərini qarşılayır.
Amma bəzən olur ki, xəstəxanada qalmaq və əlavə digər xərclər bunu üstələyir.
Hesab edirəm ki, xəstələrin xəstəxanada müalicə alma müddəti də icbari
sığortada nəzərə alınmalıdır", - S.Novruzov vurğulayıb.
Komitə sədri onu da əlavə edib ki, bir qrup xəstəliklərə pulsuz dərmanlar
ayrılır. Amma bu cür xəstələr üçün hər rayonda cəmi bir aptek yaradılıb:
"Elə olur ki, səhər açılandan oinsanlar növbəyə dururlar, dərmanlarını
ala bilsinlər. Bu apteklərin sayının azlığı problem yaradır".
Həkim Şahvələd Məmmədov siyasətçinin səsləndirdiyi fikirlər barədə
Crossmedia.az-a münasibət bildirib: “İcbari tibbi sığortanın sənədləşməsinə
dair bütün tibb poliklinikalarına göstəriş verilib və onlar mərkəzləşdirilmiş
qaydada əhalinin qeydiyyatı aparırlar. İcbari tibbi sığorta üzrə xəstələrin
müraciəti sahə həkimlərinin səlahiyyətindədir. Bütün əsas qərarları sahə həkimi
verir. Lazım gəldikdə sahə həkimi xəstəni nevroloq, dermatoloq və digər mütəxəssislərə
yönləndirir.
Hazırda xəstələr üçün elektron resept və bülleten sistemi mövcuddur ki,
bu da onların işini xeyli asanlaşdırır. Doğrudur, bu prosesdə müəyyən çətinliklər
var, lakin ümumilikdə çox sərfəli variantdır.
Sənədləşmə prosesində yaranan çətinliklərin aradan qaldırılması üçün mərkəzləşdirilmiş
qaydada ərazi üzrə tibb mərkəzləri müayinələri tərtib edir və elektron sistem
vasitəsilə xəstəni lazımi xəstəxanaya yönləndirir. Bu sistem həm dövlət, həm də
özəl xəstəxanalarda mövcuddur. Xəstə müraciət etdikdə, asanlıqla müayinədən
keçməsi üçün şərait yaradılır”.
Mənzər Abışova
19:44 30.09.2025
Oxunuş sayı: 7265
