Bağçada uşaqlara quru çörək yedizdirilirdi: Müvafiq tədbirlər həyata keçirilməli, qarşısı alınmalıdır
Abşeron rayonunun Pirəkəşkül kənd 21 nömrəli uşaq bağçasında uşaqlara səhər yeməyinə quru çörək və su verilməsi barəsində vətəndaş şikayətlərinə əsasən araşdırma aparılıb.
Bu barədə Abşeron-Xızı Regional Təhsil İdarəsinin açıqlamasında qeyd olunub.
Bildirilib ki, araşdırma nəticəsində vəzifə funksiyalarının icrası zamanı yol verdiyi nöqsanlara görə təhsil müəsissəsinin müdiri Xədicə Vəliyeva ilə bağlanmış əmək müqaviləsinə xitam verilib.
Qeyd edək ki, sosial şəbəkədə sözügedən bağçada uşaqların səhər yeməyi zamanı quru çörək və su ilə qidalanması barədə video yayılıb.
Məlum olduğu kimi, valideynlər övladlarını bağçaya qoyarkən bir çox meyarı nəzərə alırlar. Uşaqlarının təhlükəsizliyindən, onlara qayğı göstərildiyindən əmin olduqdan sonra konkret bağçaya üz tuturlar. Ancaq yanılmaq ehtimalı həmişə olur. Nəzərə almaq lazımdır ki, ata – analar heç də hər gün bağçalara gedə, oradakı proseslərlə maraqlana bilmirlər.
Nəticədə oxşar hallar artır. Üzə çıxanda isə bəzən çox gec olur...
Doğrudur, müvafiq qurumlar operativ formada formada məsələyə müdaxilə ediblər. Ancaq gələcəkdə də oxşar halların təkrarlanmaması lazımdır.
Bu barədə Crossmedia.az-a danışan təhsil eksperti Elçin Əfəndi bildirib ki, bu cür faktların araşdırılıb üzə çıxarılması üçün müvafiq qurumlar tərəfindən tədbirlər həyata keçirilməlidir: “Tədris ili ərzində müvafiq monitorinq qrupları müntəzəm yoxlamalar aparmalı, qanunsuzluğa yol verilməsinin qarşısını almalıdırlar. Nəzərinizə çatdırım ki, Nazirlər Kabinetinin müvafiq qərarı əsasında təhsil müəssisəsində təhsil alan şagirdlərin qida normaları müəyyən olunub və o normalar əsasında şagirdlər qidalanmalıdırlar”.
Ayhan Ağarazayev
12:37 06.09.2025
Oxunuş sayı: 712
