ŞOK: Keyfiyyətsiz dərman məhsullarının, vaxtı keçmiş preparatların qeyri-qanuni satış hallarına rast gəlinir
2025-ci ilin avqust ayı ərzində Səhiyyə Nazirliyi Analitik Ekspertiza Mərkəzi tərəfindən ümumilikdə 23 aptekdə yoxlama həyata keçirilib. Bildirilib ki, bu yoxlamalardan 12-si Bakı şəhərində, 11-i isə respublikanın digər şəhər və rayonlarında yerləşən apteklərdə aparılıb. Yoxlamaların 10-u planlı, 37-si plandankənar, 1-i isə yoxlamadan kənar təftiş xarakteri daşıyıb. Aparılmış yoxlamalar nəticəsində 5 aptekdə müxtəlif nöqsanlar aşkarlanıb, bu hallarla bağlı Azərbaycan Respublikasının İnzibati Xətalar Məcəlləsinin 452.1 və 452.3 maddələri üzrə müvafiq inzibati protokollar tərtib edilib. Bu inzibati nöqsanlar niyə buraxılır? Bunun qarşısı hansı formada alınmalıdır?
Crossmedia.az xəbər verir ki, mövzunu şərh edən Azərbaycan Tibb Universitetinin Farmakologiya kafedrasının dosenti, SSRİ nin ilk antioksidant preparatı Meksidolun həmmüəllifi Aydın Əliyevin sözlərinə görə keyfiyyətsiz dərman və reseptsiz satış hallarının qarşısı ictimai nəzarətlə alınmalıdır: "Bu gün əhalinin üzləşdiyi əsas problemlərdən biri də dərman təminatı ilə bağlıdır. İnsanlar ilk növbədə sağlamlığın əsasını təşkil edən suyun və qida məhsullarının keyfiyyətinə diqqət yetirməlidirlər".
Onun sözlərinə görə, ölkədə kənd təsərrüfatı məhsullarının yetərincə istehsal olunmaması xəstəliklərin artmasına, nəticədə insanların daha çox apteklərə üz tutmasına səbəb olur.
Ekspert vurğulayıb ki, aptek sistemində qanun pozuntuları müşahidə olunur: “Keyfiyyətsiz dərman məhsullarının, vaxtı keçmiş preparatların qeyri-qanuni və reseptsiz satış hallarına rast gəlinir. Bunların hər birinə görə inzibati xətalar üzrə cəza nəzərdə tutulur. Mənim fikrimcə, ictimai prosesləri pozan mənbələrin adları açıqlanmalıdır. Hansı aptekdir, harada yerləşir, müdiri kimdir – bunlar cəmiyyətə bəlli olmalıdır."
O qeyd edib ki, belə hallar yalnız apteklərə deyil, digər sahələrə də aiddir: “Dərmanların keyfiyyəti və tərkibi həkimlərin deyil, istehsalçıların məsuliyyətidir. Amma həkim yalnız diaqnoz qoyaraq dərman yazır. Bu səbəbdən, saxta, keyfiyyətsiz dərman satışı ilə məşğul olan apteklərin ictimailəşdirilməsi mütləqdir”.
Ekspert əlavə edib ki, vətəndaşların da bu sahədə hüquqlarını bilməsi vacibdir: “Aptekə gedən hər bir şəxs dərmanın qiyməti, firması və saxlanma şəraiti barədə məlumat almaq hüququna malikdir. Bu, həm cəmiyyətin sağlamlığına, həm də dövlətçiliyimizin inkişafına töhfə verəcək".
Niyaz Hacıyev
17:02 05.09.2025
Oxunuş sayı: 1386
