Sürücülər üçün qırmızı işıq: Narkotik maddədən istifadə etməyin - Yolun sonu ola bilər
Naxçıvan MR Daxili İşlər Nazirliyinin Dövlət Yol Polisi İdarəsinin əməkdaşlarının keçirdiyi tədbirlər zamanı narkotik vasitənin təsiri altında nəqliyyat vasitəsini idarə edən sürücü saxlanılıb.
Naxçıvan şəhəri ərazisində hərəkətdə olan "Saipa Tiba" markalı avtomobilin sürücüsünə qayda pozuntusuna yol verdiyi üçün saxla işarəsi verilib.
Nəqliyyat vasitəsini idarə edən Arzu Səfərovun narkotik vasitə qəbul etməsinə dair şübhələr olduğundan tibbi müayinədən keçirilməsi təmin olunub. Müayinənin nəticəsinə əsasən A.Səfərovun narkotik vasitə istifadə etdiyi məlum olub.
Həmin şəxs barəsində qanunvericiliyə uyğun olaraq protokol tərtib edilib və toplanmış materiallar hüquqi qiymət verilməsi üçün Naxçıvan Şəhər Məhkəməsinə göndərilib.
Müasir dövrdə yol hərəkəti təhlükəsizliyinin təmin olunması daxili işlər orqanlarının ən mühüm vəzifələrindən biridir. Xüsusilə narkotik vasitələrin təsiri altında nəqliyyat vasitələrinin idarə olunması ictimai təhlükəsizliyə ciddi təhdid yaradır. Bu istiqamətdə Dövlət Yol Polisi əməkdaşları tərəfindən mütəmadi profilaktik tədbirlər həyata keçirilir. Naxçıvan şəhərində keçirilən sonuncu reyd zamanı narkotik vasitə qəbul edərək avtomobil idarə edən sürücünün saxlanılması bu tədbirlərin aktuallığını bir daha göstərib.
Mövzu ilə bağlı nəqliyyat hüquqşünası Ərşad Hüseynov Crossmedia.az-a danışıb:
“Sürücünün sükan arxasında narkotik vasitələrdən, psixotrop maddələrdən və yaxud da güclü təsir edən maddələrdən istifadə etməsi çox təhlükəlidir və qadağandır. Bu, həm spirtli içkilərə aiddir. Amma alkoqolda qanunda müəyyən hədd var – sürücünün qanında alkoqolun miqdarı həmin həddən çox deyilsə, sərxoş sayılmır. Narkotik və psixotrop maddələrdə isə belə deyil: həmin maddələrdən hər hansı biri insan orqanizmində aşkarlanarsa və elementar kliniki əlamət müşahidə olunarsa, o şəxs sərxoş hesab olunur və nəqliyyat vasitəsini idarə etmək qadağandır. Bu zaman konkret sanksiyalar və cərimələr nəzərdə tutulur".
Ə.Hüseynov qeyd edib ki, narkotik vasitələr və güclü təsir edən maddələrin dövriyyəsi dövlət proqramları və qanunvericilik aktları ilə tənzimlənir: “İstehsalı, satılması, əldə olunması ümumiyyətlə qadağandır. Dövlət proqramı çərçivəsində daxili işlər orqanları, xüsusi komissiya, elm və təhsil nazirliyi, səhiyyə nazirliyi – hər kəs bu mübarizədə iştirak etməlidir. Hüquq-mühafizə orqanları – polis, prokurorluq, məhkəmələr ön plana çıxır, çünki bu vacib sosial məsələdir. Əhalinin sağlamlığının bu vasitələrlə təhdid olunmasının qarşısının alınması əsas vəzifələrdəndir".
Hüquqşünas bildirib ki, sürücülərin narkotik vasitələrdən istifadəsi həm inzibati, həm də cinayət məsuliyyəti ilə nəticələnir: “İnzibati Xətalar Məcəlləsinin 96-cı maddəsinə əsasən, sürücünün narkotik vasitələrdən sərxoş vəziyyətdə olmasına şübhə yarandıqda, o dərhal saxlanılır və müayinəyə cəlb olunur. Narkotik sərxoşluğu polis tərəfindən narkotester vasitəsilə və ya tibbi müəssisələrdə aparılan laborator müayinələrlə müəyyən edilir. Əsas məsələ odur ki, narkotik maddələr sərbəst dövriyyədə deyil və onların əlçatan olmaması üçün ciddi tədbirlər görülür".
Müsahibimiz vurğulayıb ki, narkotik, psixotrop və güclü təsir edən maddələr sürücülərin yol hərəkətinə nəzarətini ciddi şəkildə azaldır, onların reaksiyasını və psixoloji vəziyyətini dəyişir: “Belə sürücülər yuxulaya, aqressiv və qeyri-adekvat davranışlar göstərə bilirlər. Hətta alkoqol sərxoşluğuna nisbətən bu daha təhlükəlidir, çünki narkotik təsiri altında olan şəxslər bilərəkdən təhlükəli vəziyyət yarada bilirlər. Ona görə də heç bir sürücü bu maddələrdən istifadə edərək sükan arxasına keçməməlidir".
Mehriban Yariyeva
14:41 04.09.2025
Oxunuş sayı: 6383
