Sosium
Otellər kimi digər istirahət mərkəzləri də ulduzla qiymətləndirilsin - TƏKLİF
İnsan sağlamlığı üçün əsas şərtlərdən biri gigiyena qaydalarına düzgün əməl olunmasıdır. Belə ki, buna həm insan özü əməl etməli həm də müəyyən ictimai obyektlər, istirahət mərkəzləri bu məsələlərlə ciddi məşğul olmalıdır. Səhiyyə Nazirliyinin nümayəndəsinin verdiyi açıqlamaya görə ən çox şikayətlər hotellərdə təmizlik və yataq dəstlərinin dəyişdirilməsi, gözəllik salonlarında isə sanitar normaların pozulması ilə bağlı olur. Bu cür hallar insanların sağlamlıqları üçün ciddi fəsadlara yol aça bilər. Bu halların qarşısını necə almaq olar? Hansı əlavə zəruri tədbirlər görülməlidir?
Mövzu ilə bağlı sosioloq Üzeyir Şəfiyev Crossmedia.az-a açıqlama verib:
“Öncəliklə bu hotellərin, ictimai obyektlərin cəmiyyətə, mətbuat nümayəndələrinə açıq olması şərtdir. Bu cür mərkəzlərdə mütəmadi olaraq monitorinqlər aparılmalıdır ki, bu da kompaniya xarakterli olmamalıdır. Çünki söhbət ictimai təhlükəsizlikdən, insan sağlamlığından gedir. Hesab edirəm ki, istirahət obyektlərinin və digər mərkəzlərin keyfiyyət sertifikatları olmalıdır. Şəraitin diaqnostik qiymətləndirilməsindən sonra obyektlərə bu cür sertifikatlat verilməlidir. Necə ki, bir sıra ölkələrdə və həmçinin Azərbaycanda da hotellərin ulduzla qiymətləndirilməsi təcrübəsi digər istirahət mərkəzlərində də olmalıdır. Qeyd etdiyim kimi, bu cür obyektlər hər zaman mətbuata açıq olmalı, insanların fikirlərinə, tənqidlərinə açıq olmalıdır. Çünki buna ehtiyac var”.
Ayhan
14:08 04.09.2025
Oxunuş sayı: 5252
