Sosium

Mərkəzi Elmi Kitabxanaya yeni daxil olan ədəbiyyatların sərgisi keçirilir

Azərbaycan Milli Elmlər Akademiyasının Mərkəzi Elmi Kitabxanasında yeni daxil olan nəşrlərdən ibarət sərgi təşkil olunub.

Crossmedia.az xəbər verir ki, sərgidə nümayiş etdirilən kitablar elmin müxtəlif sahələrini əhatə edir. Burada klassik ədəbiyyat, folklorşünaslıq, incəsənət, tarix, ekologiya, təbiət elmləri, informasiya texnologiyaları və digər istiqamətlər üzrə tədqiqat əsərləri yer alıb.

Təqdim olunan nəşrlər arasında “Daşa yazılan tarix”, “Jurnalistika və beynəlxalq humanitar hüquq”, “Azərbaycanın beynəlxalq əlaqələrində nikah diplomatiyası (Qədim dövr–XVIII əsr)”, “Azərbaycan qadın şairlərinin poeziya antologiyası”, “Türkdilli ölkələrin milli musiqi alətləri” (Azərbaycan, türk və ingilis dillərində), “Azərbaycan milli çalğı aləti tar: konstruktiv xüsusiyyətləri və akustik xarakteristikaları”, “Naxçıvan” biblioqrafiyası, “Uşaqların Nizami Gəncəvi dünyası”, o cümlədən Türk Mədəniyyəti və İrsi Fondu tərəfindən hazırlanmış və türk dünyasının tanınmış şairlərinin yaradıcılığını toplayan “Səninləyik, Türkiyə!” kitabı da yer alıb.

Bundan əlavə, sərgidə “Azərbaycanın botanika elminin salnaməsi: bitkilərin müxtəlifliyi və onların istifadəsi (1920–2020-ci illər)”, “Qida mikrobiologiyası”, “Riyaziyyatın mexanikaya tətbiqləri”, “İlk yardım”, “Döyüşçülərin davranış qaydaları” və digər nəşrlər də oxuculara təqdim olunur.