Xaçmazda tələbə adını qazanan şəhid övladları və 600-dən yüksək bal toplayan məzunlarla görüş keçirilib
Xaçmaz Rayon İcra Hakimiyyətində “Konstitusiya və Suverenlik İli” çərçşivəsində tələbə adını qazanan şəhid övladları və 600 baldan yuxarı nəticə göstərərək ali təhsil müəssisələrinə qəbul olan məzunlarla görüş keçirilib.
Crossmedia.az xəbər verir ki, Rayon İcra Hakimiyyətinin başçısı Elnur Rzayev görüşdə tələbə adını qazanan məzunları, onların valideynlərini və müəllimlərini təbrik edib. Gənclərə biliklərə dərindən yiyələnməyi, Vətənə sadiq vətəndaş olmağı tövsiyə edib.
Bildirib ki, ümummilli lider Heydər Əliyevin diqqət və qayğısı nəticəsində Azərbaycanda müasir təhsil sistemi yaradılıb və hazırda bu siyasət prezident İlham Əliyev tərəfindən uğurla davam etdirilir. Azərbaycan Respublikasının Birinci vitse-prezidenti Mehriban xanım Əliyeva təhsil sahəsini hər zaman diqqətdə saxlayır, bu sahənin inkişafı üçün öz töhfəsini verir. Təhsil ocaqlarının maddi-texniki bazası möhkəmləndirilir, yeni məktəb binaları, əlavə tədris korpusları inşa edilir, mövcud məktəblərdə əsaslı təmir işləri aparılır.
Quba-Xaçmaz Regional Təhsil İdarəsinin müdiri Coşqun Əliyev rayonda təhsilin inkişafı istiqamətində görülən işlərdən və əldə olunan uğurlardan danışıb. Qeyd edib ki, bu il Xaçmaz rayonu üzrə 33 məzun tam orta məktəbi fərqlənmə atestatı ilə bitirib. Dövlət İmtahan Mərkəzi tərəfindən keçirilən ali təhsil müəssisələrinə qəbul imtahanlarında 19 nəfər 600-dən yüksək bal toplayıb. Ümumilikdə 650 məzun tələbə adını qazanıb.
Müəllimlər və məzunlar təhsilin inkişafına göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.
Sonda tələbə adını qazanan şəhid övladları və 600 baldan yuxarı nəticə göstərərək ali təhsil müəssisələrinə qəbul olan məzunlara fəxri fərman və qiymətli hədiyyələr təqdim olunub, xatirə şəkli çəkdirilib.
09:57 30.08.2025
Oxunuş sayı: 1062
