Sədərək Ticarət Mərkəzindəki yanğın nələri göstərdi? :"Bu qaydalara ciddi əməl olunmalıdır"
Sədərək Ticarət Mərkəzi tərəfindən icarəyə verilmiş obyektdə dünən baş vermiş yanğın günün əsas hadisəsi. Kifayət qədər böyük ərazini əhatə edən yanğın yalnız bu gün tam söndürmək mümkün olub. Hadisə nəticəsində obyekt, demək olar, tamamilə yararsız hala düşüb. Bu, milyonlarla maddi ziyan deməkdir.
Həm Sədərək Ticarət Mərkəzində, həm də digər obyektlərdə əvvəllər də oxşar hadisələr olub. Maraqlıdır, bu yanğınların əsas səbəbi nə ola bilər? Hansı qabaqlayıcı addımlar atılmalıdır?
Təhlükəsizlik məsələləri üzrə ekspert Elmar Nurəliyev suallarla bağlı Crossmedia.az-a açıqlama verib.
Onun sözlərinə görə, indidən hansısa fikir irəli sürmək düzgün olmaz: "Bu, müvafiq qurumların işidir – onlar hadisəni araşdıracaq, yanğının başvermə səbəbini müəyyən edəcəklər. Yanğının qarşısını almaq üçün bir sıra əsas tələblərə riayət olunmalıdır. Bunlara elektrik təsisatının saz vəziyyətdə saxlanması, yanma qabiliyyəti yüksək olan mal-materialların düzgün yerləşdirilməsi, işçilərin yanğın təhlükəsizliyi qaydalarına əməl etməsi, açıq alətdən ehtiyatlı istifadə və siqaretin yalnız müəyyən olunmuş yerlərdə çəkilməsi daxildir. Açıq oddan yalnız zərurət olduqda istifadə edilməli və bütün yanğın təhlükəsizliyi tələbləri yerinə yetirilməlidir. Otaqlarda elektrik şəbəkəsinin nəzarətsiz buraxılmaması vacibdir. Boş otaqlarda elektrik qurğuları və cihazlar nəzarətsiz qaldıqda qızma, qısa qapanma və alışma riski artır. Ona görə də bu qaydalara ciddi əməl olunmalıdır ki, yanğın riski minimuma endirilsin".
Müsahibimiz bildirib ki, bütün təyinatlı obyektlər qanunla nəzərdə tutulmuş yanğın təhlükəsizliyi standartlarına riayət etməli, yanğınsöndürmə vasitələri ilə təmin olunmalıdır: "Buraya ilkin yanğınsöndürmə vasitələri, yanğın hidrantları, yanğın dolabları və yanğın siqnalizasiya sistemləri daxildir. Siqnalizasiya işlək vəziyyətdə olmalı, yanğının baş verdiyi yer barədə mərkəzi pultlara məlumat ötürülməlidir. Bu, nəzarət xidmətinin və ya müvafiq heyətin vaxtında müdaxiləsinə imkan verir. Əgər siqnalizasiya işləmirsə və ya məlumat gec çatırsa, yanğın əlverişsiz hava şəraitində sürətlə geniş əraziyə yayıla bilər. Bu həm insanların təhlükəsizliyi üçün risk yaradır, həm də əmlaka ziyanı artırır. Buna görə də işçilər yanğın təhlükəsizliyi üzrə tam məlumatlı olmalıdır. Obyekt rəhbərliyi mütəmadi təlimlər keçirərək işçilərin praktiki bacarıqlarını artırmalıdır. Təlimlər işçilərə açıq oddan istifadə, təmir işləri zamanı, elektrik cihazlarını nəzarətsiz buraxmama qaydalarını öyrətməlidir. Həmçinin, 15-dən çox işçi işləyən müəssisələrdə könüllü yanğın söndürmə qrupları yaradılmalıdır. Bu qruplar yanğın zamanı əmlakın təxliyəsini həyata keçirir, müvafiq qurumlara məlumat verir və gələn yanğın maşınlarını yönləndirirlər. İlkin yanğınsöndürmə vasitələrindən istifadə edərək hadisənin qarşısını almaq mümkündür".
E.Nurəliyev vurğulayıb ki, bütün iş yerlərində yanğın təhlükəsi yoxlanmalı, təchizatın saz vəziyyətdə olduğuna əmin olunmalıdır: "Hər hansı nasazlıq yaranarsa, dərhal ixtisaslaşmış, lisenziyalı müəssisələr tərəfindən aradan qaldırılmalıdır. İşçilər praktik təlimatlar almalı, yanğın zamanı təhlükəsiz davranış qaydalarını bilməli, çıxış yolları və toplanış yerləri barədə məlumatlı olmalıdır. Bu yollarda heç bir əngəl olmamalıdır. Beləliklə, bütün bu tədbirlər kompleks şəkildə və koordinasiyalı həyata keçirildikdə, yanğın hadisələrinin qarşısını almaq daha effektiv olur.
Mehriban Yariyeva
16:12 25.08.2025
Oxunuş sayı: 8907
