O kartdan bizdə niyə yoxdur?: Valyuta əməliyyatları ilə bağlı mühüm sual
Müasir dövrdə insanlar bank kartları vasitəsilə istənilən məkanda əməliyyatlar həyata keçirə bilirlər. Bu isə təbii olaraq onlayn bankçılığın nağd əməliyyatlardan üstün olmasına səbəb olur. Lakin bəzi hallarda çətinliklər ortaya çıxır. Məsələn, vətəndaş başqa bir ölkədə – deyək ki, Çindədir və ödənişlərini Çin yuanı ilə həyata keçirməlidir. Ancaq bu zaman istifadə etdiyi bank kartı həmin əməliyyatı rədd edə bilər. Bu isə vətəndaşların işində müəyyən ləngimələr və problemlər yaradır.
Bəs belə əməliyyatlar hansı qaydada həyata keçirilir? Ölkəmizin bank kartları hansı valyutalarda ödəniş etməyə imkan verir?
Məsələ ilə bağlı Crosssmedia.az-a açıqlama verən bank məsələləri üzrə ekspert Əkrəm Həsənov bank kartları ilə bütün valyutalarda əməliyyat aparmaq mümkün olmadığını və bu, əsasən bankların beynəlxalq tərəfdaşlıqlarından asılı olduğunu qeyd edib: “Azərbaycanda istənilən valyutada əməliyyat aparmaq mümkündür. Vətəndaş istənilən valyutada məzənnəyə uyğun pul köçürə və qəbul edə bilər, bu baxımdan heç bir məhdudiyyət yoxdur. Ümumiyyətlə, kartda göstərilən valyutalar vətəndaşın istəyinə uyğun seçilə bilər. Lakin bu, müraciət etdiyiniz bankın həmin valyutalar üzrə konvertasiya aparıb-aparmamasından asılıdır. Məsələn, Çin yuanı ilə kart əməliyyatları mümkündür, lakin bəzi Afrika ölkələrinin valyutalarında əməliyyat aparmaq nəinki Azərbaycanda, hətta bir çox ölkələrdə belə mümkün deyil. Bu, tamamilə bankın əməkdaşlıq etdiyi maliyyə qurumlarından asılı olan bir məsələdir. Əgər müştəri əməkdaşlıq etdiyi bank vasitəsilə müxtəlif valyutalarda mübadilə imkanına malikdirsə, həmin valyutalarda əməliyyat apara bilər. Əks halda bu, mümkün olmayacaq. Qısası, valyuta əməliyyatları bankdan banka fərqlənir".
14:17 25.08.2025
Oxunuş sayı: 3807
