ÜST və ÜMT xəbərdarlıq edir: İfrat istilər işçilərin sağlamlığı və əmək məhsuldarlığı üçün ən böyük təhlükəyə çevrilir
Ümumdünya Səhiyyə Təşkilatı (ÜST) və Ümumdünya Meteorologiya Təşkilatı (WMO) xəbərdarlıq ediblər ki, həddindən artıq istilər işçilərin sağlamlığı və yaşayış vasitələri üçün ən böyük təhlükələrdən birinə çevrilir.
Crossmedia.az bu təşkilatların məlumatına istinadla xəbər verir ki, yeni birgə hesabat iqlim dəyişikliyi və iş yerində istilik stresi, daha uzun, ekstremal istilik dalğaları kimi artan riskləri vurğulayır. Kənd təsərrüfatı, tikinti və balıqçılıq sahələrində çalışan işçilərin artıq təhlükəli temperaturun təsirindən əziyyət çəkdiyini vurğulayan bu sənəd inkişaf etməkdə olan ölkələrdə uşaqlar, yaşlılar və aşağı gəlirli icmalar da daxil olmaqla, həssas qrupların artan təhlükələrlə üzləşdiyinə diqqət çəkir.
ÜST Baş direktorunun müavini Ceremi Farrar bildirib: “İstilik stresi, xüsusən də ən həssas icmalarda artıq milyardlarla işçinin sağlamlığına və yaşayış vasitələrinə ziyan vurur. Bu yeni təlimat insanların həyatını qorumaq, bərabərsizliyi azaltmaq və istiləşən dünyada daha davamlı işçi qüvvəsi yaratmaq üçün praktiki, sübuta əsaslanan həllər təklif edir”.
Əlli il davam edən araşdırmalara əsaslanan hesabat artan temperaturun həm sağlamlığa, həm də məhsuldarlığa necə təsir etdiyini vurğulayır.
ÜMT təsdiqləyib ki, 2024-cü il sənayedən əvvəlki temperaturdan 1,55 dərəcə Selsi çox olan 40 °C-dən yuxarı gündüz temperaturları adi hala çevrilib, bəzi ərazilərdə hətta 50°C-dən çox olub. 2024-cü il tarixdə ən isti il olub, builki göstəricinin isə daha yüksək oacağı təxmin edilir.
Təşkilatın Baş katibinin müavini Ko Barret deyib: “Peşə istiliyinin stresi qlobal sosial problemə çevrilib və bu, artıq ekvatora yaxın olan ölkələrlə məhdudlaşmır. Avropadakı son isti dalğası buna bariz misaldır. İşçilərin həddindən artıq istidən qorunması təkcə sağlamlıq üçün vacib deyil, həm də iqtisadi zərurətdir”.
Hesabatda həddindən artıq istilərin iş dünyasını necə dəyişdirdiyi təfərrüatları var. O, müəyyən edir ki, 20°C-dən yuxarı hər dərəcə üçün işçi məhsuldarlığı 2-3 faiz azalır. Onun sağlamlığa təsirləri isə istivurma, susuzluq, böyrək funksiyasının pozulması və nevroloji pozğunluqlar da daxil olmaqla genişmiqyaslıdır. Ümumiyyətlə, hazırda dünya əhalisinin təxminən yarısı yüksək temperaturun mənfi təsirlərini yaşayır.
13:07 24.08.2025
Oxunuş sayı: 5409
