Övladları valideyn nəzarətindən buraxmağın acı sonu: Abortlar artır!
Ötən il Azərbaycanda 78 245 abort qeydə alınıb. Onlardan 72-si 15-17 yaş, 2 679-u isə 18-19 yaş qrupuna aiddir. Məlumat “Azərbaycanda səhiyyə, sosial müdafiə və mənzil şəraiti” statistik məcmuəsində yer alıb.
Bu rqəmlər göstərir ki, Azərbaycanda abort halları hələ də yüksəkdir. Yeniyetmə və gənclər arasında da abort hallarıa rast gəlinməsi isə xüsusilə təhlükəlidir. Ekspertlər hesab edir ki, bu, cinsi tərbiyə və ailə planlaşdırması barədə maarifləndirmənin kifayət etməməsi ilə bağlıdır və sosial dəstək tədbirlərinin gücləndirilməsinə ehtiyac var.
Mövzu ilə bağlı sosioloq Üzeyir Şəfiyev Crossmedia.az-a açıqlama verib.
O, övladlarını nəzarətsiz buraxan valideynlərin gələcəkdə ciddi fəsadlarla üzləşə biləcəklərini bildirib: “Statistik məlumatlar göstərir ki, Azərbaycanda abortların sayı kifayət qədər yüksəkdir. Bu, insanların uşaq dünyaya gətirmək istəklərinin zəiflədiyini göstərən ciddi göstəricilərdən biridir. Daha narahatedici məqam isə odur ki, bu rəqəmlərdə nikah yaşına çatmamış şəxslər də yer alır. Son illərin göstəricilərinə baxdıqda görürük ki, bu mənzərə təəssüf ki, sabit şəkildə davam edir. Xüsusilə 18–19 yaş qrupunda 2 679 abort hadisəsinin qeydə alınması, ailə institutunda nəzarət mexanizmlərinin zəiflədiyini və funksionallığın azaldığını göstərir. Valideynlərin övlad üzərində nəzarətinin azalması, arzuolunmaz hamiləliklərin artması və gənclərin cəmiyyətimiz üçün xarakterik olmayan həyat tərzinə meyillənməsi bu göstəricilərin əsas səbəblərindəndir. Əvvəllər belə hallara daha çox Qərb, Avropa və Rusiya cəmiyyətləri haqqında xəbərlərdə rast gəlinirdi. Lakin bu gün mövcud statistika göstərir ki, təəssüf ki, oxşar hallar artıq bizim cəmiyyətimizdə də müşahidə olunur".
Müsahibimiz söyləyib ki, bu faktlar valideynləri ciddi şəkildə düşündürməlidir: "Onlar övladlarına düzgün istiqamət verərək, sağlam mənəvi dəyərlərlə tərbiyə etməli, nəzarəti məsuliyyətlə təşkil etməlidirlər. Valideyn-övlad münasibətləri səmimiyyət və qarşılıqlı etimad üzərində qurulmalı, ailə mühitində açıq ünsiyyət təmin olunmalıdır. Çünki valideyn anlayışının mahiyyəti övlad üzərində etibarlı nəzarət və qayğı deməkdir. Son illər bəzi valideynlərin öz missiyalarını tam dərk etməməsi və övladlarını nəzarətsiz buraxması, onların gələcək həyatında ciddi fəsadlara yol açır. Bu səbəbdən ailə qurmağa hazırlaşan gənclər valideynlik məsuliyyətini dərindən dərk etməli, övlad böyütməyə mənəvi və psixoloji cəhətdən hazır olduqlarından əmin olmalıdırlar. Ancaq bu halda ailə mühiti sağlam, valideyn-övlad münasibətləri isə möhkəm olar. Əks halda, nəzarətsiz qalan gənclər arasında arzuolunmaz halların və mənfi statistikanın artması qaçılmazdır”.
Nicat Rüstəmzadə
14:32 14.08.2025
Oxunuş sayı: 879
