Rusiyanın nazı ilə çox oynayan ABŞ: "..."Ciddi yanaşmırlar"
Ukrayna Prezidenti Volodimir Zelenski iyulun 30-da ABŞ ilə silah sazişlərinin əsas prinsipləri üzrə razılıq əldə edildiyini açıqlayıb. O bildirib ki, razılaşmalar ABŞ-nin prezidenti Donald Trampla müzakirə olunub və bu əməkdaşlıq iki ölkə arasında münasibətləri daha da gücləndirəcək. Zelenski, həmçinin ABŞ-nin Rusiyaya qarşı prinsipial mövqeyini yüksək qiymətləndirərək, Moskvanın sülhə məcbur edilməsinin vacibliyini vurğulayıb.
Tərəflər arasında əlsə olunan silah sazişlərinin müharibənin inkişafına təsiri barədə Crossmedia.az-a danışan hərbi ekspert Üzeyir Cəfərov bildirib ki, Ukrayna ilə Rusiya arasında sülh sazişlərinin əsas prinsiplərinin razılaşdırılması hələ çox uzaqdadır və bu barədə danışmaq tezdir. Onun sözlərinə görə, indiki əsas məqsəd atəşkəsə nail olmaqdır: "Lakin təəssüf ki, hələ bu baş verməyib. Rusiya Ukraynanın şəhərlərini, qəsəbələrini və vilayətlərini bombardman edir, dron hücumları və ballistik raketlərlə hücumlar həyata keçirir. Bu gün də ölən və yaralananlar var. ABŞ Rusiyaya çoxdan təzyiq göstərməli idi. Təəssüf ki, Prezident Donald Tramp Rusiyanın hazırkı rəhbərliyinin cinayətlərinə qarşı ciddi mövqe sərgiləmədi və onun "kaprizləri" ilə çox oynadı. Nəticədə Tramp özü də başa düşdü ki, Rusiya prezidenti onu nüfuzdan salır və imicinə böyük zərbə vurur".
Ekspert qeyd edib ki, Rusiya Şimali Koreya, Çin və İrandan aldığı hərbi yardımlarla Ukraynanın müdafiə imkanlarını zəiflətməyə çalışır: "Eyni zamanda, tətbiq olunan sanksiyalar, xüsusilə sonuncu — 18-ci sanksiya paketi — Rusiyaya ciddi təsir göstərib və ölkədə əsəbilik yaradıb. Rusiya iqtisadiyyatının sanksiyalara dayanıqlı olduğunu iddia etməsi sadəcə blefdir. Reallıqda Rusiya çox ağır iqtisadi təzyiqlər altındadır və bu da regionda təhlükəsizliyin bərqərar olması üçün ciddi çətinliklər yaradır".
O, ABŞ-nin Rusiyaya təzyiqləri artırmalı olduğunu, bunun səbəbinin Rusiyanın işğalçılıq siyasətindən əl çəkməsinə nail olmaq olduğunu söyləyib.
Ekspert, həmçinin Rusiya Müdafiə Nazirliyinin Donetsk vilayətinin Çasiv Yar şəhərini ələ keçirməsi barədə təkrarlanan bəyanatlarını qeyri-ciddi hesab edib və bu faktın Rusiyanın davranışında qarışıqlığı nümayiş etdirdiyini vurğulayıb: "Bu gün dünya dövlətləri Rusiyaya ciddi yanaşmırlar. ABŞ və Rusiya prezidentləri arasında olan təhqiredici ifadələr Rusiya siyasətindəki xaotik vəziyyəti bir daha göstərir. Bu davranış Rusiya üçün ciddi nəticələrə səbəb olacaq və ölkə daxilində təlatümlər baş verəcək. Sülh prosesinin tezliklə baş verəcəyinə inanmıram və Rusiyanın inadkarlığının Ukrayna xalqına böyük zərər verdiyini düşünürəm. Boş bəyanatlarla Rusiyanı bu addımlardan çəkindirmək mümkün deyil. ABŞ və müttəfiqləri Rusiyaya maksimum iqtisadi, siyasi və hərbi təzyiqləri artırmalıdır ki, Moskva, nəhayət, işğalçılıq siyasətindən əl çəksin".
Mehriban Yariyeva
14:21 31.07.2025
Oxunuş sayı: 13248
