Tramp-Putin münasibətləri gərginləşib: "ABŞ-nin müharibəyə qatılmaq ehtimalı yoxdur, amma..."
ABŞ Prezidenti Donald Tramp deyib ki, o, rusiyalı həmkarı Vladimir Putinlə danışmaqda maraqlı deyil. Halbuki ikinci hakimiyyət dövrünün ilk vaxtlarında Ağ Ev rəhbəri Rusiyaya qarşı kifayət qədər loyal idi. Bu loyallıq fonunda hətta Trampın Rusiyanın agenti olmasına dair də məlumat yayılmışdı. Sonuncu telefon danışığından sonra isə Tramp Putinin müharibəni davam etdirməkdə israrlı olduğunu bildirdi və müzakirədən narazılığını ifadə etdi. Bu gün isə o, artıq Kreml rəhbəri ilə müzakidə maraqlı olmadığını bildirir.
Deyəsən, "pişik asqırıb". Trampla Putinin bu kimi inanclara inanıb- inanmadığını dəqiq bilmirik. Amma dəqiq olan odur ki, artıq vəziyyət dəyişir.
Dəyişən "oyun qaydalarının" perspektivi barədə Crossmedia.az-a danışan politoloq İlqar Vəlizadə deyib ki, məlumatlara görə ABŞ nümayişkarcasına Böyük Britaniyaya nüvə silahı göndərib: "Bu, 2008-ci ildən ilk dəfə baş verir. Bu ondan xəbər verir ki, Tramp hazırda Rusiya ilə daha çox təzyiq dili ilə danışmağa üstünlük verir. Çünki danışıqlar heç bir nəticə vermir. Ona görə də danışıqlardan hansısa bir nəticə gözləmək çətindir. Yeri gəlmişkən, iki lider arasında bir neçə dəfə telefon danışığı da olub. Lakin Trampın sözlərinə görə, bu danışıqlar heç bir nəticə verməyib. Bu, Vaşinqtonun ənənəvi dəst-xəttidir. Yenə davam edəcək. Yəni Ukraynaya dəstək artırıla bilər. Eyni zamanda Rusiyaya və onun ticarət partnyorlarına olunan təzyiqlər də artırıla bilər. Hətta bu da son nəticədə Rusiyanı güzəştə getməyə məcbur edə bilər. Hər halda Tramp belə düşünür. Əgər müharibə bu şərtlərlə davam edərsə, Rusiyanın həm iqtisadi durumu, həm də hərbi-siyasi vəziyyəti kifayət qədər pisləşəcək. Çünki Tramp sələfi Cozef Bayden deyil, daha cəsarətli addımların atılmasının tərəfdarıdır. Hazırda ABŞ-nin müharibəyə qatılmaq ehtimalı yoxdur. Amma müharibə şiddətlənə və Rusiya üçün fəsadları arta bilər”.
Ayhan
16:38 29.07.2025
Oxunuş sayı: 10063
