Medvedev Trampı hədələdi: ABŞ- Rusiya müharibəsi başlayacaq?
Rusiya Təhlükəsizlik Şurası sədrinin müavini Dmitri Medvedevin ABŞ-Rusiya münasibətlərinə dair verdiyi son açıqlama bir daha Kremlin ritorikasında gərginliyin artırılmasına yönəlmiş tendensiyanı göstərir. O, ABŞ prezidenti Donald Trampın Rusiyaya qarşı ultimatumlarını əsas gətirərək, vəziyyətin Ukrayna ilə yox, birbaşa Rusiya və ABŞ arasında münaqişəyə çevrilə biləcəyini iddia edib. Bu cür bəyanatlar, ekspertlərin fikrincə, daha çox Rusiya daxilindəki ictimai rəyə hesablanıb və real siyasi çəki daşımır.
Bu barədə Crossmedia.az-a danışan politoloq Oqtay Qasımov bildirib ki, Ukrayna savaşı başlanandan sonra Medvedevin sosial şəbəkələrdə yazdığı fikirlər artıq ciddiyyətini itirməkdədir: "O, tutduğu posta uyğun olmayan açıqlamalar verməklə bərabər, həm də Rusiyanın imperiyapərəst düşüncəsinin ifadəsinə çevrilib. Medvedevin son vaxtlar Trampın açıqlaması ilə bağlı söylədiyi fikirlər də bu qəbildəndir. Ukraynada gedən savaş heç də ABŞ ilə Rusiya arasında getmir. Əgər elə olsaydı, onun nəticələri çox fərqli olardı".
O.Qasımov vurğulayıb ki, bu fikirlər sadəcə Rusiya siyasi hakimiyyəti tərəfindən daxili auditoriyaya yönəlmiş fikirlərdir: "Bununla onlar Ukraynadakı uğursuzluğu ört-basdır etmək üçün göstərməyə çalışırlar ki, guya Ukraynada onlar bütün dünyaya, o cümlədən ABŞ-yə qarşı vuruşurlar. Ona görə də istədikləri nəticələri hələ ala bilməyiblər.”
Mehriban Yariyeva
14:00 29.07.2025
Oxunuş sayı: 1792
