İsrail dayanmır: ABŞ-ni hansı təhlükə gözləyir?
Serbiya prezidenti Aleksandar Vuçiç Yaxın Şərqdə artan gərginlikdən narahatlığını ifadə edərək, ABŞ-nin, çox güman ki, İrana zərbə endirməyə hazırlaşdığını deyib. O, həmçinin məsələnin diplomatik yolla həllinə ümid etdiyini bildirib.
Serbiya lideri bu barədə "TV Prva"nın efirində deyib.
"Artıq çoxlu qüvvələr cəlb olunub. Amerikanın üçüncü təyyarədaşıyan gəmisi bütün kontingenti ilə təkcə Hind okeanına deyil, daha çox - İranın özünə, Fars körfəzinə və Hörmüz boğazına doğru gedir. Ona görə də düşünürəm ki, amerikalılar hücuma hazırlaşırlar, amma ümid edirəm ki, bu, belə olmayacaq. Ümid edirəm ki, bu, təhdid və təzyiqin ən yüksək səviyyəsidir. Hesab edirəm ki, hələlik razılaşma əldə oluna bilər”, - deyə o qeyd edib.
O qeyd edib ki, Avropa sülh yolu ilə nizamlanma təklif etməyə çalışır, lakin Vaşinqtonun onlardan nə dərəcədə razı qaldığına əmin deyil. Onun fikrincə, Yaxın Şərq münaqişəsi qlobal münaqişəyə çevrilə bilər ki, bu da neftin qiymətinin və inflyasiyanın sıçrayışına səbəb ola bilər.
Vuçiçin səsləndirdiyi mübahisəli fikirlər barədə Crossmedia.az-a danışan beynəlxalq münasibətlər üzrə ekspert Əziz Əlibəyli qeyd edib ki, Serbiya Rusiyanın Balkanlardakı müttəfiqidir: “Uzun müddət idi ki, Qərbin Serbiyanı sıradan çıxarmaq planları var idi. Planın birinci hissəsi Yuqoslaviyanın dağıdılması, sonrakı mərhələ isə Serbiyanın Yuqoslaviya ölkələrini yavaş-yavaş itirməsi idi. Sonda Kosovanın yaranması ilə tam cəzalanma bitdi. Məsələ odur ki, bu fikrin Serbiya tərəfindən deyilməsi həm də Rusiyanın tezisini səsləndirməsi anlamına gəlir. ABŞ-nin İrana zərbə endirməsi məsələsi isə əvvəlki qədər gündəm deyil. Bu məsələ 3,4 gün əvvəl daha actual idi. Hazırda ABŞ və İran arasında danışıqlar üçün ipucunun olduğu ortadadır. O baxımdan böyük ehtimal ki, danışıqlara gediləcək. Amma təbii ki, istisnalar da var. Nəticədə İsrail ABŞ-dən müharibəyə qatılmaqla bağlı qərarı ala bilmədi. Lakin “ala bilmədi” o demək deyil ki, almayacaq. ABŞ-nin orada dəniz donanmaları var. Elə bir proses yaşana bilər ki, Qırmızı dənizdə, Bəsrə körfəzində, Hind okeanının coğrafi nöqtələrində ABŞ-nin başına çox oyun gələr”.
Ayhan
12:25 21.06.2025
Oxunuş sayı: 9371
