Tramp Ukraynadan yaxasını çəkib Yaxın Şərqə yönəlib
Haaqada keçirilən NATO sammiti beynəlxalq gündəmin əsas diqqət mərkəzindədir. Sammit çərçivəsində Ukrayna-NATO Şurasının xarici işlər nazirləri səviyyəsində xüsusi iclasının keçirilməsi, eləcə də müdafiə nazirlərinin ayrı-ayrılıqda toplaşması, Qərbin Ukraynaya dəstəyinin növbəti mərhələyə keçəcəyinə dair ehtimalları gücləndirir. Bu görüşlər NATO-nun yeni baş katibi Mark Ruttenin və Niderlandın müdafiə naziri Ruben Brekelmansın sədrliyi ilə işçi nahar formatında gerçəkləşdi. Bəs görəsən, bu sammit Ukraynada davam edən müharibənin gedişinə və ya onun sonlanmasına real təsir göstərə bilərmi? Ukrayna üçün praktik və strateji baxımdan hansısa əhəmiyyətli nəticələr gözləməyə dəyərmi?
Mövzu ilə bağlı politoloq Aydın Quliyev Crossmedia.az-a açıqlama verib: “NATO-nun qərərgahı və əsas ölkələri Ukrayna müharibəsini qələbə ilə yekunlaşdırmaq üçün çox ciddi şəkildə yollar axtarır. ABŞ prezidenti Donald Trampın Ukrayna məsələsindən yaxasını bir qədər kənara çəkməsindən sonra NATO ölkələri, xüsusilə Avropa qanadı intensivlik göstərməyə başlayıb. Bu gün NATO-nun Kanadada yekunlaşmış zirvəsində Ukrayna ilə bağlı yekun bəyanat qəbul edilməsə də Ukraynaya hərbi yardımın davam etdirilməsi ilə bağlı ümumi rəylər ifadə olundu ki, bu da NATO-nun hələ də Ukrayna məsələsində həlledici tərəf kimi qaldığını deməyə əsas verir. Ötən sammitdə Ukrayna ilə bağlı yekun bəyənatın qəbul edilməsi ABŞ-nin mövqeyinə görə mümkün olmadı. Ancaq bu dəfə Avropa liderlərinin toplanışı Ukrayna müharibəsinin istiqamətini dəyişdirmək üçün atılan addım hesab oluna bilər. Avropa dövlətlərinin Macarıstan və Slovakiyanı istisna olmaqla hamsı Urkayna məsələsində yekdildir. Ona görə də Ukraynaya hərbi yardımın daha da gücləndirilməsi ilə bağlı budəfəki görüşdə müəyyən tövsiyyə xarakterli ideyalar səsləndi. Ancaq indiki şəraitdə kardinal dəyişiklik etmək o qədər də mümkün görünmür. Xüsusən Trampın burdan yaxasını çəkib diqqəti Yaxın Şərqə yönəltməsi Ukrayna müharibəsində yeni mərhələ və perspektivlərin yaranmasının qarşısını alır”.
Ayhan Ağarzayev
15:47 20.06.2025
Oxunuş sayı: 10177
