“Xərçəng xəstəliyinin olmaması üçün bu tövsiyyələrə əməl etmək kifayətdir” – HƏKİM
Xərçəng – Müasir dövrün ən təhlükəli xəstəliklərindən biri olaraq hələ də milyonlarla insanın həyatını təhdid edir. Bu xəstəlik yalnız orqanizmdəki hüceyrələrin nəzarətsiz şəkildə çoxalması ilə deyil, həm də yaratdığı fiziki, psixoloji və sosial təsirlərlə insan həyatına dərindən təsir edir. Tibb elminin sürətli inkişafına baxmayaraq, xərçəng bir çox hallarda erkən mərhələdə aşkar olunmadığı üçün müalicəsi çətinləşir. Lakin vaxtında diaqnoz, düzgün müalicə strategiyası və həyat tərzində aparılan dəyişikliklər sayəsində bu xəstəliklə mübarizədə ciddi nailiyyətlər əldə etmək mümkündür. Türk dünyasında xərçəng xəstəliyi ilə mübarizə aparan həkimlər Bakıda bir araya gəlib. Burada xərçəngin erkən diaqnostikası, profilaktikası və müalicəsi üzrə ortaq əməkdaşlıq imkanları müzakirə olunaraq birgə "yol xəritəsi" hazırlanacaq. Bunun əsasında müxtəlif komissiyalar yaradılacaq. Həmin komissiyalar da Türk Dövlətləri Təşkilatına üzv ölkələrin xərçənglə mübarizə strategiyasını formalaşdıracaqlar. TDT-nin xərçənglə mübarizə strategiyası özünü doğruldacaqmı?
Mövzu ilə bağlı həkim cərrah Adil Qeybulla Crossmedia.az-a açıqlama verib:
“Ümumiyyətlə bütün dünyada xərçəng əleyhinə mübarizə strategiyası var. Bunun elmi əsasları da yolları da var. Ümumiyyətlə xərçəng əleyhinə mübarizə sistemi nədir? Xərçəngi infeksion xəstəlik kimi təsəvvür etmək lazım deyil. Xalq arasında belə bir deyim var ki, kimsə xərçəngin dərmanını tapacaq və bununla da iş bitəcək. Lakin bu belə deyil. Bizim hər bir hüceyrəmiz, toxumalarımız bizim genlərimizlə, siqnal intensivliyi ilə bağlıdır. Əgər bu siqnal intensivliyi genin nəzarətindən çıxırsa həmin hüceyrələr orqanizmdə qalır artır, amma onlara resurs lazım olur ki, bu da orqanizmin özündə olur. Sanki bir orqanizmdə ona tabe olmayan və onunla rabitəsini tamam itirmiş ikinci bir inkişaf baş verir. Xərçəng budur. Xərçəng bir faktora bağlı deyil, çoxfaktorlu xəstəlikdir. Bu genetik faktordan tutmuş ətraf radiasiya, fiziki amillərə, xroniki iltihabı prosesə və müxtəlif viruslara bağlıdır. Mən düşünürəm ki, xərçəng əleyhinə mübarizə sisteminin bütün dünyaya təqdim etdiyi tövsiyyələrə əməl edilməsi kifayətdir. Türk Dövlətləri Təşkilatının da ümumi strategiyaları ola bilər. Hər bir dövlət bu ümumi qaydalara əməl etməli, insanlar arasında da maarifləndirmə proqramları aparılmalıdır”.
Ayhan Ağarzayev
13:46 18.06.2025
Oxunuş sayı: 643
